MSL kan nghak chhuak ta ; Zanin dar 8-ah Zarkawt BCA VS BC Bethlehem
GIG Motors Mizoram Super League Season 5 chu zanin dar 8:00 aṭangin Hawla Indoor Stadium-ah khelh ṭan a ni dawn a, match hmasa berah champion lai Zarkawt BCA leh BC Bethlehem te an inhmachhawn ang.
En châkawm
Season liam ta khan MSL club panga inthurualin state pawn player la loin Mizo hlangin an khel a, lakluh tum awmchhun Mission Veng Vikings pawh an hma lakna a tlawlh leh tak avangin Mizo hlang thoin an khel tluan.
Tun season erawh a danglam dawn. MSL club paruk ten state pawn player an nei vek dawn a, Zarkawt Serpents tih loh team dang panga BCA, Khatla TBL, Vikings, Tuikual South leh BC Bethlehem ten foreign player an nei vek.
MSL5-a inlan tur foreigner te hi player ṭha tak vek an ni a, America rama basketball inelna NCAA-a inlan tawh te an ni hlawm a, tualchhung basketball hrechiang te chuan MSL3-a Vikings champion puitu Ronald March tluk pui an nih an rin thu an sawi a, a en tlak viau dawn tih a hriat theih.
BCA an ṭha
Zarkawt BCA coach Lalruat-fela chuan, "Season liam taa kan champion ai khan kan ṭha zawk. Lalrina hian MVP a nih ṭum ai khan 3BL leh India Camp-a a awm hnu hian a chak zawk a, a ṭha zawk. Chutiang bawkin player dang pawhin hma an sawn a, Pupu-a pawhin training-naah a dunk pawp pawp thei a, MSL khel turin kan inpeih tawh," tiin Vanglaini a hrilh.
Champion lai BCA hi kum hmasa lam ang thoin an squad a chhah ṭha a, MVP ni lai Lalrina Renthlei, Mizo player zinga sang ber Matthew Lalremtluanga (Pupua) bakah hian guard hmuhnawm Zonunsanga te an la nei a, state pawn player Sowkin Shetty a rawn thleng tawh bawk.
Afela chuan, "Sowkin Shetty hian dunk vel chu a harsat lo a, amaherawhchu amah hi defensive player a ni a. Kan ṭhat pui viau turah kan ngai. Cameron Anderson la thleng thei lo erawh a uiawm kan ti a, chutihrualin playing five-ah state pawn emaw foreigner pakhat bak a chhawr theih loh," tiin Shetty an neih tho avangin Cameron Anderson-a awm loh an tawrh a rin loh thu a sawi.
Inkhel chungchang sawi zuiin BCA coach chuan, "BC Bethlehem hi club thar an nih avanga zuam ngawt chi an ni lo a, MSL hi chu a che che sih hlawk ang deuh hi a nia, vawi hnih chak loh zawn phei chuan relegate hi a hnai nghal uar zel. Chuvangin BC Bethlehem nena kan inkhel tur hi a pawimawh a, match hmasa ber aṭangin Zarkawt mipui ṭanpuina kan mamawh nghal ang," tiin a sawi.
MSL club thar
BC Bethlehem hi club thar an ni a, MSL kai puitu foreigner Irakoze Kavakure Brian an chelh a, India national team-a tel pha Arvind Arumugam a rawn thleng bawk.
BCB coach Ricky Lallawm-kima chuan, "Match hmasa bera Zarkawt BCA kan hmachhawn nghal avangin ngaihtuahna sen nasat lehzual a ṭul a, kan khingpui tur khelh dan pawh kan zir uluk. Zonuna leh Remsanga te hi kan veng mi an nih avangin ka hrechiang a, Lalrina pawh kan veng uluk ang. Kan fitness a ṭha a, kan thawhhona a ṭhat chuan kan chak thei ang," tiin Ramthar tlangval chuan an Zarkawt BCA nena bul ṭan an tum thu a sawi.
Team boruak sawi chhun-zawmin Ricky chuan, "MSL club thar kan ni a, Bethlehem mipui pawh an phur hle. Kan khelhna tur hmun hi kea thlen phei phak lek a ni a, ṭantu kan nei ṭha dawn. Anni hi kan chakna hnar tur an ni," tiin a sawi. BC Bethlehem hian Mizo player neih ṭhat lamah BCA an tluk lo a, entu lamah erawh Zarkawt mipui aiin Bethlehem mipui an tam a rinawm zawk.