Lalremsiami'n Mizoram thleng ta ; Vawiinah Jeremy nen lawmpuina hun

Mizo infiammi chhuanawm pahnih Jeremy Lalrinnunga leh Lalremsiami Hmar ten, Youth Olympic Games 2018 neih zawh taka hlawhtlinna an chan lawmpuina hun chu vawiin tlai dar 4:00 hian Mizoram Sports Department bul tumin Synod Conference Centre-ah hman a ni dawn.

India hmeichhe hockey team vice captain Siami hian nimin khan Aizawl a rawn thleng tawh a, Hockey Mizoram huaihawtin Lengpuiah a hmuahna hun hman a ni - weightlifter Jeremy-a pawh vawiin October 23 hian a rawn thleng zui ve bawk ang.

Govt. Complex rawlthar Jeremy-a'n Argentina khawpui Buenos Aires-a inelna neih zawh takah khan, weigltlifting 62kg huangah gold medal chhawi chhuakin - Indian infiammi zingah Youth Olympic Games bikah gold medal la thei hmasa ber a ni hial.

Kolasib tleirawl Siami hian Youth Olympic silver medal a lak hma khan Asian Games-ah India chu pahnihna a nih pui tawh a, Mizo infiammi zingah Asian Games-a medal la thei hmasa ber leh awmchhun a la ni.

Siami chuan, "Hlawhtlinna ka chan theih nana min lo ṭawngṭai pui ṭhin Mizo mipui zawng zawng chungah ka thinglung takin lawmthu ka sawi," tiin Vanglaini a hrilh a, a beisei aiin a hlawhtlinna lawmpuitu an tam thu a sawi bawk.