Old Trafford-ah Ronaldo a kir dawn

UEFA Champions League-ah zanin dar 12:30 hian Manchester United-in Old Trafford-ah Juventus an mikhual dawn a, Italian champion hian Cristiano Ronaldo an hruai tel dawn avangin inkhel tur hian ngaihven a hlawh hle.

Juventus hian Valencia leh Young Boys hneh tawhin point ruk hmuin hmahruaitu an ni a, United hian point li an hmu thung. Group H inkhel dangah Young Boys-in Stade de Suisse-ah zanin dar 10:30 hian Valencia an mikhual ang.

En bik tur Ronaldo

Juventus-in Mestalla Stadium an tlawh ṭumin Ronaldo chu hnawhchhuah a ni a, Portuguese forward red card hmuh dan hi ennawn a nih hnuah Valencia defender Jeison Murillo chunga a chet dan chu tharum thawh tumna a awm loh avangin match khat bak hrem a ni lo.

Young Boys nen a inlan loh avangin Ronaldo hian Juventus kawr hain Champions League-ah goal a la khung lo a, a club hlui Manchester United chu a goal khungna hmasa ber a ni thei ang.

Ronaldo hian Real Madrid tana a khelh laiin amah chher hriamtu Sir Alex Ferguson-a enkawl United lamah Santiago Bernabeu leh Old Trafford-ah a khung ve ve a, quarterfinal-ah Los Blancos a hruai thleng.

Hemi ṭum hian Ronaldo chuan, "Ka tan chuan zan danglam bik a ni a, supporter-te min chhawn dan kha a ropui takzet a ni," tiin a sawi a, goal a khung zawh pawh hian a lawm duh lo.

Tunah hian Cristiano Ronaldo hi kum 33 a upa a ni tawh a, goal khung duha a tuihal dan erawh a la ngai reng. Kartawp khan Portuguese forward hian Genoa lamah goal a khung a, Europe league sang pangaa goal 400 khung tling thei hmasa ber a ni a, tun hma ang thoin ven bik ngai player a la ni reng.

Mourinho nen...

Sporting CP tana a khelh laiin Ronaldo hian Mourinho enkawl Porto hi Primeira Liga-ah vawi hnih an hmachhawn a, an chak lo ve ve. Kum 2003-ah Ronaldo hian United a zawm a, Champions League last 16-a Mourinho enkawl Porto hneh lo team-ah khan a tel. 2003-04 season-ah Mourinho-a'n Chelsea zawm thungin United elpui ber an ni chho a, November 2005-ah chauh Ronaldo hian Mourinho enkawl team a hneh chauh a, match 40 chhung hneh loh nei tawh lo Blues record an titawp.

Ronaldo hian kum li hnuah chauh Mourinho team a hneh leh a, March 2009 khan Inter Milan chu Old Trafford-ah 2-0 in an hneh a, goal a khung. He goal chiah hi Ronaldo-a'n Mourinho enkawl team vawi 14 a hmachhawnah a khung.

Engtin zel?

Manchester United manager Jose Mourinho chu league lama result a neih ṭhat loh avangin ban theih dinhmunah a ding reng a, amaherawhchu match hnuhnung pahniha Newcastle United leh Chelsea an hmachhawn ṭuma an khelh danah nunna thar a awm avangin Portuguese manager hi a la him.

United midfielder Juan Mata chuan Stamford Bridge-a anmahni ṭantute chet danah full mark a pe a, Old Trafford-ah ṭantu an nei ṭha lehzual ang. Chelsea lama goal hnih khungtu Anthony Martial chu Juventus lama United hmachhuan tur niin a lang a, club hlui hmachhawn tur Paul Pogba pawh midfield-ah a langsar ang. Tlarhma lama awm Romelu Lukaku pawhin hmun pawimawh a chang chhunzawm zel dawn a, a pawimawh tel ang em tih erawh zawhna a tling.

Juventus pawhin season bul ṭan ṭha mah se an match hnuhnung berah Genoa nen 1-1 in an inhnehtawk. Manager Massimiliano Allegri chuan, "Kan ngaihtuah tawk loh vangin goal kan chhuah. Kan rilruin Manchester United nena kan inkhel tur kan ngaihtuah tel a, kan tawrh phah ta a ni," tiin a sawi. Hemi aṭanga lang chiang chu United nena an inkhel tur an ngai pawimawh tih a chiang a, Old Trafford-a hnehna an chang thei a nih chuan group stage paltlang a harsa tawh lo ang.