Hamburg-in fan-te halmawi hal phal dawn

German club Hamburg chuan tun kar tawpa an match khelh tur atan fan-te halmawi hal an phalsak dawn a, enchhinna ang chauha kalpui tur a la ni rih thung. 

Bundesliga 2 club hian Inrinni tlai dar 5:30-ah Karlsruher an mikhual dawn a, Hamburg hian German second division-a an home match atan hian halmawi chi hrang hrang 10 hman phal an dil. 

Hamburg dilna a hlawhtling a, German Football Association (DFB) chuan halmawi hi inkhelh hmaa hal a nih tur thu sawiin heti lama mithiam bikten uluk taka an vil tur thu a sawi - kang ṭhelh lam pawhin an vil reng dawn a ni. 

Europe-a football ground tam zawkah halmawi leh kangmei ti chhuak thei ang chi thil reng reng hal phal a ni lo a, Hamburg hian nikumah he dan hi an bawhchhiat avangin £250,000 (Nuai 232.30) lai an lo chawi tawh.