India tan Rohit & Virat an che pui

West Indies-in India rama an mangchhia an tlanchhiatsan hleithei lo. Test series-ah 2-0 a an tlawm hnuin Pathianni khan ODI series match nga an khelh tura an match hmasa berah an tlawm lehnghal a, Rohit Sharma leh Virat Kohli an ngam lo.

Guwahati khawpuia inkhelah West Indies an bat hmasa zawk a, over 50 chhunga run 322 siamin wicket riat an hloh a, an dinhmun a ṭha hle - Shimron Hetmyer chuan run 106 siamin century a vaw chhuak a, run 51 siamtu Kieran Powell chuan fak a phu viau bawk.

India tan target a hautak tham a, chak beisei ngam a harsa. Mahse, Men in Blue tan opener Rohit Sharma a rawn che pui nghal a, a tawp thleng damin run 152 ngawt a vaw chhuak!

Rohit nena rawn pen chhuak Shikhar Dhawan chu run li chiah siamin out mah se amah thlaktu hi Virat Kohli a ni a, India captain hian run 140 ngawt a rawn siam.

India hian over 42.1-ah an target an umphak der a, wicket hnih chiah an hloh! Nilaini chawhnu dar 1:30-ah team pahnih hian series match hnihna an khel leh ang.

Kohli-a'n captain nichungin ODI-ah vawi 14 ngawt century a siam ta a, captain nichunga ram tana ODI siam hnem lamah Australian legend Ricky Ponting (22) chiah a phak tawh lo.

Hrait tel atana ṭha erawh Kohli hian captain nichunga ODI century vawi 14 vaw chhuak tur hian match 50 chiah a mamawh a, Ponting hian vawi 22 century nei turin match 220 a mamawh thung.