Real Madrid: An tho dawn nge an tlu hlen dawn?

Tun hnaia team talbuai tak Real Madrid chuan zanin dar 12:30 hian Viktoria Plzen nen Champions League group stage match an khel dawn a, Real tan fiahna hun a ni.

Real Madrid hian an league match hnuhnung pali aṭangin point khat chiah an la hlawh chhuak a, an match hnuhnung berah Levante chu 2-1 in an ngam lo.

Real coach Julen Lopetegui dinhmun a him lo tih hai rual a ni lo a, Levante nena an inkhelh zawh hian club president Florentino Perez chuan club captain Sergio Ramos nen titipuina a nei hial.

Chak a ngai

Real tana thil pawimawh ber chu 'chak a ngai' tih hi a ni tawp mai. An league match hnuhnung pali-ah an chak zo lo a ni mai lo a, Champions League-ah pawh CSKA Moscow chu rin loh takin 1-0 in an ngam lo!

Awlsam taka an thunun tur nia ngaih group-ah pawh Real-in eng ruai an ang lo a, match hnih khel tawhah point thum chauh neiin CSKA hi hmahruaitu an ni mek.

Real hmabaka awm chu El Clasico a la ni cheu a, Barcelona nen an intawn hmaa team 'tenau' Viktoria Plzen an tum theih tur hi an vannei a, he hun ṭha meuh pawh hi an chhawr thei lo a nih chuan Lopetegui tan Real enkawl chhunzawm zel hi beisei chi niin a lang lo.

Lopetegui nang vang?

Beisei ang result an nei lo miau a, Real chetchhiat chhan hi tu mawh nge, tih chu zawhna awm hmasa ber a ni a, mit fukna hmasa ber chu coach Lopetegui a ni.

Spain coach hlui hian Real a kaihhruai hmasak berah UEFA Super Cup a khel nghal a, an hmelma kumhlun Atletico Madrid an ngam lo nghal - league match hmasa pali-ah an tlawm loh avangin an insiamṭha emaw an ti a, mahse tuna an dinhmun kan hria.

Lopetegui-a'n tlarhnung nghet ṭha tak aṭanga team din aiin a naute tlanchhuah tam tir a thlang a, Levante lakah he khelh dan phung hi a thlak dawn emaw an ti a, a thlak chuang lo - an khingpuiin counter attacking hmanga an beihin an talbuai ziah a, tun season-a an goal chhuah 89% chu first half-a an chhuah a ni!

Player thiam loh?

Real player en ila, beisei an phak lo tlangpui. Raphael Varane chu tlarhnungah 'mangchhia' ang mai a ni a, Luka Modric, Marco Asensio leh Marcelo ten beisei an phak lo char char bawk.

Attacking game khelh nuam ti em em Asensio hi beisei angin a 'ṭhangduang' lo a, Modric-a'n FIFA Player of the Year khelhin a khel lo a, Marcelo-a'n season dang a la phak lo bawk. Tlarhmaah Gareth Bale, Karim Benzema leh Mariano Diaz te chu innghahna an ni.

Bale-a'n season bul ṭan ṭha viau mah se kum danga a buaina hliam bawk chu a buaina a ni a, Benzema-a'n chuai lam a pan tawh niin a lang a, Mariano lah Real te ang tana 'innghahna' atan chuan a la nau mah mah bawk - league match kuaah Real-in goal 13 chiah an la khung!

A tawpah President

Real fan-ten puh tur an zawng a, a tawpa an lungawi lohna ber chu club president Florentino Perez a ni. Nipui transfer-ah Lopetegui-a'n player duh nei nual mah se goalkeeper Thibaut Courtois leh right-back Alvaro Odriozola bak pek a nei lo.

Perez-a'n Ronaldo a chan avangin player langsar Eden Hazard, Neymar leh Kylian Mbappe te hming lam rik a ni a, mahse tumah lalut loin Bale, Benzema, Mariano leh Vinicius Jr te a ring tawk.

Hei mai hi a ni lo, tun hnaia hralh - Danilo, Alvaro Morata leh Pepe-te hmun ruak luah tur tun thlengin lakluh an la ni lo; hei vang hian fan-ten Perez an dem hi a awm a, zaninah hnehna an chang zo lo a nih chuan a tuartu tur erawh Lopetegui a ni ang.