Everton chakna substitute

Pathianni zan Premier League inkhel pakhat awmah Everton chuan an mikhual Crystal Palace 2-0 in an hneh a, Toffees goal pahnih hi Dominic Calvert-Lewin leh Cenk Tosun te khung a ni.

Goodison Park-ah Wilfried Zaha-a penalty hlawhchhuah chu Luka Milivojevic-a'n petin, Everton keeper Jordan Pickford chuan a ke in a dan sak.

Hun tawp dawn thlengin goal a lut lo a, team pahnih inkhel tawk takah Marco Silva chuan thutlukna fuh tak siamin, hun tawp nan minute thum chauh a awm tawh tihah bench aṭanga rawn lut Calvert-Lewin-a'n goal hmahruai a tauh lut a, minute hnih hnuah Tosun hmangin an khung zui bawk.

Point hmu tura an inngaih hnuah goal an chhuah a, Crystal Palace manager Roy Hodgson chuan, "Point thum hmu thei kan ni a, penalty kan hlah. Penalty khung lo mah ila point khat tal chu hmu thei tur kan ni, point hmu lo bawka Goodison Park chhuahsan chu a hrehawm hle.

"A chang chuan football hian i phu tawk ang lawmman a pe lo ang che, kan tih theih chu result ṭha neih theihna tura thawhrim chhunzawm a ni. Premier League-ah chuan match zawng zawng hi a hautak vek a ni," tiin a sawi. Palace hian point sarih chiah an la hmu a, table-ah 15-na an ni mek.

Toffees boss Marco Silva chuan, "Keimah chauh ka ni bik lo, heti lai hmuna awm coaching staff hian thutlukna kha kan siam a ni. Starting 11 an pawimawh a, chutih rualin anni chauh an ni lo, bench aṭanga rawn lut pathum khan an khel ṭhain an goal nawr a na em em a ni," a ti.

Everton hian an match lehpekah chuan Man-chester United an tlawh dawn a, hna a hautak dawn. Hetihlai hian Palace hna pawh a awlsam dawn bik lo, October 28 tho hian Selhurst Park-ah Arsenal an mikhual dawn a ni.