Hamilton-a'n a nghah rih a la ngai dawn
Lewis Hamilton tan Formula 1 nomawi chawi turin intlansiak dang a nghah leh rih a ngai dawn. Mercedes driver hi Pathianni zana tlan zawh tak US Grand Prix-ah pathumna a ni a, a elpui ber Sebastian Vettel chu a hnung chiahah a thleng thung.
Circuit of the Americas-ah lap 19 chauh tlan tur a awm tih thlengin Hamilton-a'n hma hruaiin a vawi nga nan a champion ngei dawn niin a lang hman. Mahse, soft tyre a hman chuan a tawp a thlen zo dawn loa hria in a vawi hnih nan pit stop a neih a ngai - Kimi Raikkonen chuan hnehna a chan theih phah a ni.
Britain tlangvalin US-ah a duh ang result nei lo mah se, Mexico Grand Prix an tlan hunah pasarihna china a thleng a nih chuan nomawi a kawl lai a humhim thei dawn tho; intlansiak hmabak pathum an la neihah point 75 hmuh theih la awm chungin atan nomawi chu ban phakah a awm tawh.
Champion rih lo mah se Hamilton chuan a lawm tawk thu sawiin, "Kimi ka lawmpui hle, tihsual nei miah loin ropui takin inelna a hmachhawn a ni. Verstappen pawhin fak a phu, a tyre hman a fuh zawk avangin ka hmaah a thleng a ni. Kha aia ṭha zawk khan kan thlen thei tih chu ka hria a, mahse kan thlen chinah lungawi a ṭul. Tunah chuan kar leha inelna kan hmachhawn tur atan rim takin inbuatsaihna kan nei chhunzawm ang," tiin a sawi.
Ferrari driver Raikkonen-a'n hnehna a chan avangin a teammate Vettel-a beiseina chu a la vawn nun sak hram, pakhatna nih a nawm thu sawiin Raikkonen chuan, "Chawlhkar nuam tak a ni. Car kan nei ṭha em em a, a tir aṭanga a tawp thlengin kan tlan ṭha hle a ni," a ti.
US Grand Prix Results
# Driver Ram Team
1 Kimi Raikkonen Fin Ferrari
2 Max Verstappen Hol Red Bull
3 Lewis Hamilton Gbr Mercedes
4 Sebastian Vettel Ger Ferrari
5 Valtteri Bottas Fin Mercedes
6 Nico Hulkenberg Ger Renault
7 Carlos Sainz Spa Renault
8 Sergio Perez Mex Force India
9 Brendon Hartley Nzl Toro Rosso
10 Marcus Ericsson Swe Sauber
Driver Championship Table
# Driver Ram Team Points
1 Lewis Hamilton Gbr Mercedes 346
2 Sebastian Vettel Ger Ferrari 276
3 Kimi Raikkonen Fin Ferrari 221
4 Valtteri Bottas Fin Mercedes 217
5 Max Verstappen Hol Red Bull 191
6 Daniel Ricciardo Aus Red Bull 146
7 Nico Hulkenberg Ger Renault 61
8 Sergio Perez Mex Force India 57
9 Kevin Magnussen Den Haas 53
10 Fernando Alonso Spa McLaren 50