Final-ah Saina Nehwal a chak lo
Badminton inelna ngaihhlut pakhat Denmark Open final-ah Saina Nehwal chu Tai Tzu Ying hneh loin pahnihna a ni. Pathianni zan inkhelah Saina hi minute 52 chhungin world number 1 lakah hian 13-21, 21-13, 6-21 in a chak lo a ni.
Indian shuttler hian Chinese Taipei nula hi tun hnaiah a ngam lo thei hle a, kumin chhung ringawt pawhin vawi nga a hneh lo; an intawn tawhna pumpuiah 13-5 in a hnufual zawk a ni - Saina tan a hneh theih loh player laka chak dan ngaihtuah chhuah a ngai tawh hle.
Kumina an intawn tawhna Indonesia Masters, All England Championships, Badminton Asia Championship leh Asian Games-ah te Saina hian hnehna chang thei ni se la chuan world ranking lamah pawh tuna a dinhmun 10-na ai chuan a sang ngei ang.
Denmark Open final-ah pawh Tai Tzu Ying a chungnung leh hle, game hmasa berah 11-6 a hmahruai nghalin; an inkhelh chhung zawngin Saina hian hmahruai lai a tawng ve hman lo a ni.