Playoff-ah Rooney khelhna United

Wayne Rooney awm hmain dinhmun hniam takah awm mah se DC United chu MLS playoff khel thei dinhmunah an ding ta reng mai. Nimin zing khan United hian Rooney goal hnih hmangin New York City FC chu 3-1 in an hneh.

England captain hlui Rooney hian minute riatna lekah goal hma­hruai a khung a, second half-ah penalty a chhuih lut bawk - kum 32 mi striker hian MLS season khatna a hman laiah goal 12 a khung der tawh.

DC United hian season tir lam an match hmasa 14-ah vawi hnih chiah hnehna an chang thei a, Eastern Conference-ah a mawng­phah luahtu an ni, an tan MLS playoff chu beisei ngam chi pawh a ni meuh lo.

Amaherawhchu, Rooney an neih chinah erawh thil a danglam chiang hle, match kua ngawt chu hneh loh tawng loin an kaltluang a, an match hnuhnung pangaah hnehna an chang hial bawk.

Regular season an la zo lo a, an match hnuhnung ber atan Inrinni hian Chicago Fire nen an inkhel leh ang; hnehna an chang a, an elpui dang an chak lo a nih chuan pathumna dinhmun luah thei an la ni - 2015 hnua a vawi khat nan playoff an khel dawn chiang tawh.