Champion lai Chelsea chak awlsam

Beisei lawk ang ngeiin Champions League nomawi kawltu Chelsea an chak a, Champions League last 16 first leg-ah French champion Lille chu 2-0 in an hneh - Blues fan-ten quarterfinal an mitthla der a nih pawhin dem theih an ni lo.

Stamford Bridge-a inkhelah hian Chelsea tan Kai Havertz leh Christian Pulisic te chuan goal khat ve ve an khung a, Lille-in a chhanletna tur an neih loh avangin khualmualah an tlawm.

Blues tana chanchin lawmawm lo erawh hliam vanga Hakim Ziyech leh midfielder Mateo Kovacic lakchhuah an ngai chu a ni a, Pathianni zanah Liverpool nen League Cup final an khelh zui dawn avangin Chelsea fan-te an hlauthawng khawp ang.

Chelsea boss Thomas Tuchel chuan, "Chawlhlawk laia Mateo ka la chhuak lo kha ka tisual a ni. Hakim chungchangah doctor ka la be lo a, a serious loh hram ka beisei. Thawhlehni chauh a la ni a, final-ah chuan an dam hman turah ngai ang," tiin hma hun êng takin a thlir.

Lukaku aiah Havertz
Chelsea-in pound maktaduai 97.5-a Romelu Lukaku an lei khan a chungah fan-ten beiseina sang tak an nei a, Belgian striker hi tlarhmaa a hmawr bawk tur an mamawh chhanna ni turah an ngai. Mahse, Lukaku hian Chelsea a pan hnuah match 28 khelin goal 10 chiah a la khung!

Kartawp inkhela Crystal Palace laka vawi sarih chiah ball tawh fuh a nei chuan sawiselna a ti hluar lehzual; 2003-04 season aṭanga mumal taka record neih a nih hnua Premier League match-a minute 90 khel tling zinga ball tawk tlem ber record a siam!

Lille lakah pawh Tuchel-a'n bench-ah Lukaku dahin Havertz chungah rinna a nghat a, German forward hian a pu beiseina a tithlawn lo - minute riatna lekah Ziyech corner aṭanga ball kal chu a tauh lut a, Chelsea hma a hruaipui.

Kum 22 mi Havertz hi a vanneih zan ni se goal dang pawh khung thei a ni. Cesar Azpilicueta siamsak chu yard ruk vel lek aṭangin a pet goal lo a, Lille keeper Leo Jardim-a'n ṭha taka a dansak pawh uiawm tak a ni.

A hming Kante
Chelsea tan N'Golo Kante chu player langsar a ni a, France international hian midfield-ah ro a rel - hmun awl a hnawh khat zung zung a, a thawkrim a, a taima a, Blues goal nawr nan a ṭangkai hle bawk.

Blues goal hnihna pawh Kante hlawhchhuah liau liau tia sawi theih a ni. French midfielder hian halfway line thlen hma aṭangin ball a khalh lut a, Pulisic tan a siamsak.

American foward hian Kante duhsakna chu goal hmangin a chhanglet a, minute 63-naah 2-0 a nih avangin chak tur a chiang hma tiin a sawi theih - Pulisic tan tun season Champions League-a a goal hmasa ber a ni.

Pulisic hi minute 80-naah Tuchel chuan a la chhuak a, a aiah Timo Werner a rawn tlan lut. German coach-in bench-a Lukaku a ṭhut tluan tir chu sawi hlawh a ni a, forward a thlak chungin Lukaku tan hmun a awm lo.

Uain ṭha mi
Kum 37 mi Thiago Silva-a'n Chelsea tan bul a ṭan a, a kum tam tawh mah se uain ṭha mi ang maiin a ṭha tawlh tawlh em ni chu aw, tih mai tur a ni a, Brazilian defender hian a khel ṭha takzet.

Lille tlarhmaten Silva kaihhruaina hnuaia ding Blues tlarhnung paltlang an harsat a, French club chance neih tur tam tak a dang chat a, a tawnhriat neih ṭhat chu hun hlauhthawnawmah a chhawr ṭangkai ṭhin viau mai.

Kum 40 a hnaih viau tawh chungin a ṭuan a la muang lo tih hmuh turin a awm a, tlan chak a ṭul hunah pawh a tlan thei viau - Frank Lampard-a'n Chelsea a enkawl chhunga a tihfuh pawl chu Silva a lo lalut hi a ni hial ang!

Paris Saint-Germain aṭanga free transfer-a an lakluh defender hi Blues fan-te pawhin tunah chuan an atchilh rawn emaw tih mai tur a ni a, Lille nena an inkhelah pawh minute 90 chhung a hming lam chungin an zai.

UCL Last 16
First leg
February 15, Thawhlehni
Paris Saint-Germain 1 - 0 Real Madrid
PSG: Kylian Mbappe 90+4'
Sporting Lisbon 0 - 5 Manchester City
MAN: Riyad Mahrez 7'; Bernardo Silva 17', 44'; Phil Foden 32'; Raheem Sterling 58'

February 16, Nilaini
RB Salzburg 1 - 1 FC Bayern Munich
RBS : Chukwubuike Adamu 21'
FCB : Kingsley Coman 90'
Inter Milan 0 - 2 Liverpool
LFC : Roberto Firmino 75'; Mohamed Salah 83'

February 22, Thawhlehni zan
Chelsea 2 - 0 Lille
CHE: Kai Havertz 8'; Christian Pulisic 63'

Villarreal 1 - 1 Juventus
VIL: Dani Parejo 66'
JUV: Dušan Vlahovic 1'

February 23, Nilaini zan (Result kan hre hman lo)
Atletico Madrid 01:30 AM Manchester United
Benfica 01:30 AM Ajax

Second Leg
March 8, Thawhlehni zan
Bayern Munich 1:30 AM RB Salzburg
Liverpool 1:30 AM Inter Milan

March 9, Nilaini zan
Manchester City 1:30 AM Sporting Lisbon
Real Madrid 1:30 AM Paris Saint-Germain

March 15, Thawhlehni zan
Manchester United 1:30 AM Atletico Madrid
Ajax 1:30 AM Benfica

March 9, Nilaini zan
Juventus 1:30 AM Villarreal
Lille 1:30 AM Chelsea

Away goal rule hman lai chu ni se, kan dinhmun a ṭha lehzual tur a ni a, mahse, goal kan chhuah loh avangin ka lawm a, a phu pawh kan phu a ni. Team ṭha tak kan hmachhawn avangin Lille dang chat tura inkhelh kha thil harsa a ni a, tihsual leh tih ṭhat pawh kan nei a, mahse, Lille khan chance hlauhawm tak erawh an nei loin ka hria. Kan khawng ṭha a, harsa tak karah pawh kan thawhhona a ṭha a, game harsa tak ni mah se chak erawh kan phu a ni. - Thomas Tuchel, Chelsea boss

Kan tlawm avangin kan hnual a, a bik takin si hnih faia tlawm chu a hrehawm duh hle. Pawi ka tih ber chu pumpelh theih goal kan chhuah kha a ni a, kan thiam loh vanga chak lo ni loin, tihsual vanga tlawm kan ni.
Stamford Bridge-ah huaisen taka inkhel turin kan lo kal tih kan pholang thei a, Chelsea kha nuam ti takin an khel bik lo. Kan tum ber chu kan intawn leh huna a ṭha thei ang bera khelh a ni a, team ṭha tak an nih avangin tlarhnung pawh khawng taka rem kan tum ang. A harsa dawn tih kan hria a, mahse, kan khelmualah, fans khat vek chungin kan khel dawn. Zaninah tlawm mah ila, zam tur kan ni lo - kan khelmualah chance kan nei leh dawn a, team ṭha tak tum dawn mah ila kan inringtawk tur a ni. - Jocelyn Gourvennec, Lille coach