Mumbai an chak; an beisei semifinal
Thawhlehni zan Indian Super League inkhelah Mumbai City chuan 1-0 in East Bengal an hneh a, semifinal khelh ngei an beisei ve zel - top four-ah an inpetkai.
Mumbai goal awmchhun hi minute 51-naa Bipin Singh-a khung a ni a, Kolkata club-in a chhanletna tur an neih loh avangin an tlawm a, table mawng luahlumtu an ni mek.
City an chak avangin Thawhṭanni zana Bengaluru FC ngam lotu Odisha tan semifinal beiseina a bo zui ta thung a, Mizo tamna club hian tun season-ah semifinal an khel dawn lo.
Terina a hmuhnawm
East Bengal tan rawlthar duhawm Lalrinliana Hnamte chuan bul ṭanin hmuhnawm a tling a, Dungtlang khaw chhuak, Chanmari siam len rawlthar hian minute riatna lekah chance duhawm a nei a, mahse, a ball tauh ṭha zet chu Mumbai keeper Mohammad Nawaz chuan ṭha takin a lo dang.
ISL-a a season hmasa ber hmangtu Terina hian Naorem Mahesh Singh tan goal khungna remchang ṭha takin a siamsak bawk a, mahse, Manipur forward hian a chance neih a chhawr thei lo - Terina siamsak tho Fran Sota khung loh pawh uiawm a tling.
First half-ah East Bengal hi an vanduai zawk tiin a sawi theih a, inkhel ṭantir lama Thongkhosiem Haokip-a'n a chance neih duhawm pahnih a chhawr theih lohte chu uiawm tak a ni.
A tawpah Mumbai
Goal lut loin chawlhlawk hman a ni a, second half-ah erawh goal hmu turin nghah rei a ngai lo - minute 51-naah Bipin Singh chuan mual ding lam sir aṭangin ball a lalut a, penalty box pawn aṭangin a khung.
East Bengal-in si phurh sut ngei tumin an nawr a, chance pawh an nei nual - defender tawnhriat nei ṭha Raju Gaikwad-a'n a bin luh ngei tura ngaih Nawaz-a'n hnai set sawta a lo dante chu uiawm tak a ni.
Mumbai tan Cassinho chuan chance duhawm a nei bawk a, mahse, East Bengal keeper Sankar Roy a pet khum tawh hnuah a goal lo - a tawpah erawh Mumbai an chak ta tho a, an mamawh point thum an hlawh chhuak.
Mizo & hmabak
Mumbai a pan hnuah Lallianzuala Chhangtein hmun pawimawh a chang zel a, Lunglei tlangval hian inkhel bul ṭanin minute 90-naah lakchhuah a ni thung. Lalengmawia chu Mumbai tan player pawimawh a nih chhunzawm zel a, East Bengal lakah pawh a khel tluan.
Islanders (Mumbai City sawina) hi he thu buatsaih lai hian palina ni mah se nizana Kerala Blasters leh Hyderabad FC result a zirin, he thuziak i chhiar meuh chuan an dinhmun a danglam leh tawh mai thei - match thum an la hmabak.
City boss Des Buckingham chuan, "Point tam thei ang ber hlawhchhuah a, a sang thei ang bera season khar kan duh a ni," a ti a, semifinal khelh a tumruh hle.