Palina nih inchuh Arsenal leh Wolves Emirates Stadium-ah intawng dawn
Premier League champion tum inum boruak a nung thar leh a, chutiang tho chuan palina nih phak tura inel an awm ve bawk. Champions League khelh phak a pawimawh avangin zanin inkhel tur pawh hian ngaihven a hlawh.
Zanin dar 1:15 hian Emirates Stadium-ah Arsenal leh Wolverhampton Wanderers an inkhel dawn; team pahnih inthlauhna hi point hnih chauh a ni a, chutih rualin a chunga awm Gunners hi match khatin an khel tlem, zanina an chak chuan an dinhmun a ṭha khawp ang.
A vawi hnihna
February 11, Zirtawpni khan Molineux Stadium-ah team pahnih hi an inkhel a, defender Gabriel goal khat hmangin mikhual Arsenal 1-0 in an chak. Sawi zui hlawh takin Gabriel Martinelli hnawhchhuah a ni, tunah hian hremna a la hmang zo hman lo.
Bruno Lage enkawl Wolves hian Gunners an ngam loh hnuah Tottenham (2-0) leh Leicester City (2-1) te an hneh leh tawh, hun rei lote chhunga an insiamṭhat dan hi a nasa hle; zaninah pawh chak an tum ngam ang.
Arsenal erawhin Wolves an hmachhawn hnuah khan Brentford nen chauh an la inkhel, an khingpui tur pakhat Chelsea-in Club World Cup an khelh avangin an inkhelh hun sawn a ngai. Wolves nena an boruak hmasa kha theihnghilhna hun an la nei ve hman lo.
Hmabak a tam
Premier League season ṭan nia an hneh loh Brentford an hneh let hnuah Arsenal beiseina a sang zual a, manager ropui Arsene Wenger chhuah hnua a vawi khat nan Champions League khelh leh ngei pawh an tum.
Arteta chuan, "Match khelh hmabak 15 lai kan la nei, a point ang zawnga sawi phei chuan hmuh tur a la tam hle. Kawng zawh tur kan la nei thui takzet a, thil tum leh duh chu nei mah ila UCL ticket chu sawi hun a la ni lo.
"Player zawng zawng inkhel turin inpeih reng thei se tih hi a pawimawh lai chu a ni. Thui tak thlir a ngai a, chutih rualin match khelh hmabak zel atan chauh rilru kan pek a ngai bawk, match khat atan vawi khat chak a tawk," a ti.
Beisei awmchhun
Arsenal hian season hmasa an hman chhiat avangin European football an khel phak lo. FA Cup leh League Cup aṭangin an tla tawh bawk a, season kal laia an beisei theih awmchhun chu Premier League-ah a sang thei ang ber thlen a ni.
Club lian dangin inelna dang an khelh laiin an lo hahchawl thei a, match an neih tlemna hi an chhawr thei a nih chuan ṭhatpui tham a ni. Chutih rualin match nei tam thei lo khawpa tlahniam an nihna erawh hriat tel a ngai, hmasawnna tur an la ngah hle.
Hale End chhuak Bukayo Saka chu rinrawl a ni a, ani ang bawka an academy chhuak Emile Smith Rowe nen Wolves lakah en hlawh bik an ni leh ang. Anni pahnih hian mual sir aṭangin goal an nawr ṭhin, an chet danin team-ah nghawng a nei lian leh ang.
Wolves an ṭha
Nuno Espirito Santo kaihhruaina hnuaiah inkhel hmuhnawm an chhawp chhuak ṭhin a, mahse Portuguese manager hian Tottenham a pan san - Spurs hian an banna a rei leh tawh. Portuguese manager tho Bruno Lage hoin team an insiamrem leh tawh viau a ni.
Kum 2022 bikah Premier League match ruk an khelhah vawi nga an chak thei, an hneh loh awmchhun chu Arsenal chiah an ni. Ruben Neves leh Daniel Podence te inkawp hmangin Gunners tlarhnung sut hawn ngei an tum tawh ang.
Lage chuan, "Football-ah thuruk a awm thei lo, thawhrimna leh thawhhona ṭha a pawimawh ber," tiin a lo sawi tawh. Arsenal hmachhawn tur pawh hian theihtawp an chhuah leh dawn a, North London club lak aṭangin point an hlawh chhuak a nih pawhin a mak lo ang.