Goal khung tura piang Vlahovic

Champions League a khelhna hmasa berah Dusan Vlahovic a inthlahrung lo, second 32-na lekah goal ṭha bik a khung nghal. Mahse, a goal hi Juventus chak nan erawh a tawk zo lo - Old Lady hi Villarreal nen 1-1 in an inhnehtawk.

Thawhlehni zan UCL last 16 first leg inkhelah Paulo Dybala awm lo mah se goal kan hmu hma hle. Spanish club lamin bul an ṭan a, mahse an ball hloh chu Danilo-a'n tlarhma a awm Vlahovic tan a vawrh lut nghal.

Kum 22 mi Vlahovic-a'n boruaka ball kal hi a awmin a dawng a, a hmaah player pahnih leh goalkeeper la awm mah se buaina nei miah loin a khung zui nghal - UCL match khelh hmasak bera goal khung rang ber record a siam.

German international hlui Andreas Moller-a'n UCL match a khelh hmasak berah second 38 chhung lekin goal a lo khung tawh, record dinglai hi second 32-ah a rawn khum ta chiah a, khum leh chu a har tawh ang.

Spanish club an tlawm duh bik lo. Second half minute 66-naah Dani Parejo chuan si phurh a sut, a siamsaktu chu Etienne Capoue siamsak a ni. Samuel Chukwueze laka che mawi lo Adrien Rabiot an hnawt chhuak lo kha Juve an vannei chhunzawm ta zawk.

Fiorentina aṭanga Juventus zawmtu Vlahovic chuan, "Champions League match hmasa bera goal khung nghal chu a lawmawm hle, rilru pawh a khawih. Mahse, kan chak zawh loh avangin kan lawm erawh a kim lo.

"Villarreal khan huaisen takin min bei let a, an phu ang ngeiin goal pawh an khung. Second leg chu Allianz Stadium-ah a ni tawh dawn, tun aia ṭha zawk hian kan khelh theih ngei ka beisei," tiin a sawi.

Villarreal coach Unai Emery chuan, "Ka naute khan kan puitling tawh tih an lantir theih avangin ka lawm. Mimal an puitling tawh a, team thawhhona pawh a ṭhain kan in man tlang viau. Goal hnihna kan khung lo kha a uiawm lai chu a ni," a ti.

Second leg hi March 16, Thawhlehni zanah khelh a ni leh dawn. Kumin Champions League aṭang hian away goal rule tih bo a ni a, khualmuala goal khung hnem zawk nih khan awmzia a nei dawn lo.