Vawiin aṭangin Manipur Vs Mizoram

Ranji Trophy-ah Manipur leh Mizoram te vawiin chawhma dar 9:00 aṭangin Jadavpur University Campus Ground, Kolkata-ah an inkhel dawn.

India rama cricket inelna ngaihhlut Ranji Trophy hi ni li chhung khelh tur a ni a, hnehna chang turin ni li chhungin khingpuite vawm hlum vek a ngaih bakah run siam tam zawk nih a ngai.

Manipur hian an match hmasa berah Arunachal Pradesh chu innings khat leh 25 runs in an hneh a, an chak chian avangin bonus point neiin point sarih a hmu tawh.

Mizoram hian Bihar an chelh thung a, amaherawhchu first innings-ah run an siam tlem zawk avangin point khat chauh an hmu thung.

Cricket inelnaah hian Manipur hi Mizoram aiin an ṭha zawk a, tun ṭum inelnaah pawh hian state pawn player pathum lak theih nachungin an state player hlangin an khel.

Mizoram erawhin Ranji Trophy-a tawnhriat nei ṭha Taruwar Kohli, Uday Kaul leh Iqbal Abdulla te an kawl a, hetichung hian Manipur hi an buk a la rit zawk. Tun ṭum inkhel tur hi tualchhung Mizote tan fiahna a ni thei ang.