UCL final khelhna tur sawn dawn

Ukraine-Russia ram buaina avangin tun season Champions League final khelhna tur chu an sawn ngei a rinawm. Kumin final hi May 28 hian Krestovsky Stadium, Saint Petersburg-a khelh tura ruahman a ni.

Europe-a football thuneitu sang ber UEFA chuan, "Thil awm dan kan zir chiang reng a, a ṭul a nih chuan thutlukna siam a ni ang," tiin final neihna sawn a nih theih thu an sawi.

Ukraine-Russia ram buaina hian Champions League bakah hian World Cup playoff pawh a nghawng thei ang. Russia hian March 24-ah Poland an mikhual dawn a, hnehna an chang a nih chuan Sweden leh Czech Republic inkhela chak zawk nen March 29, 2022-ah an inkhel leh ang.

Ukraine pawhin playoff an khel dawn a, khualmualah Scotland an hmachhawn dawn. Hnehna an chang a nih erawh chuan Wales emaw Austria emaw an hmachhawn dawn a, an muala khelh dan a awm dawn.