Nadal che fuh chhunzawm zel

Australian Open nomawi a chawi hnuah Rafael Nadal chuan inelna a hmachhawn leh ṭan a, hnehna a chang lehnghal. Nimin zing khan Mexican Open-ah Denis Kudla chu 6-3, 6-2 in a hneh.

Hard court inelnaah Nadal hi beisei aiin a che fuh chho mek. Mexican Open khelh laiah player langsar an tel hnem avangin Spanish tlangval hian seeded palina a hauh phak chauh a ni a, a khelh dan en erawh chuan champion tura rinkai a ni.

Kum 35 mi Nadal chuan, "Bul ṭanna ṭha tak a ni, a bik takin straight set hmanga hnehna chan chu duhthusam a ni. Match khelh chhung zawng khan ka thi ṭha viauah ka ngai, chutih rualin hmasawnna tur erawh ka la nei," tiin a sawi a, hmasawn zel a tum.

Season kal laiah Nadal-a'n match 10 khel tawhin a la chak fai vek, a match leh pek atan vawiin hian Stefan Kozlov a hmachhawn leh ang. American tlangval Kozlov hian inkhel dangah Grigor Dimitrov a lo hneh ve thung a ni.

Grand Slam vawi 21 champion tawh Nadal tan kum ṭha a ni mek, 2014 khan a match hmasa 11-ah hnehna a lo chang vek tawh a, chumi hnuah Stan Wawrinka chu Australian Open-ah a hneh lo. A record hmasa nihrual turin match khat chak a la hmabak.

Nimin inkhel dangah Daniil Medvedev pawhin hnehna a chang. Russian tlangval hian Benoit Paire chu 6-3, 6-4 in a hneh ve bawk. World number 2 Medvedev chuan, "Hahchawlhna hun hman hnua inkhelh leh hi chu a nuam.

"A ṭha ber angin ka la khel chhuak lo a ni mai thei, ka khelh danah erawh ka lawm. Player ṭha tak ka hmachhawn nghal a, kan point hmuh chauh en chuan inkhel awlsam a nih duh hmel mai thei, a takah erawh a harsa hle thung," a ti.

Mexican Open-ah Medvedev hi a champion a nih chuan world number 1 a ni thei dawn. Dubai Championship lamah Novak Djokovic a inlan thung a, ani hi lo champion ve pawh ni se, Medvedev-a'n hlawhtlinna a chan chuan a lehpel dawn tho.

Medvedev chuan, "Ram dangah Novak a inkhel tih ka hria, a nihna tak sawi chuan ka rilruah chuan a awm ve tho mai. Mahse a pawimawh ber erawh mahni match khelh hmabaka ṭha taka khelh a ni," a ti. World number 68 Pablo Andujar nen an inkhel leh dawn a ni.

World ranking mumal taka siam a nih hnuah player 26 ten number 1 dinhmun an luah tawh. Medvedev hi a ni thei a nih chuan player 27-na a ni ang; Russian player zingah Yevgeny Kafelnikov (1999) leh Marat Safin (2000-01) hnung a zui bawk ang.