Rangers lakah Haaland-a'n Dortmund a chhan thei ang em?

Zanin hian Europa League Knockout Playoff second leg match riat khelh tur a awm dawn a, chung zingah chuan zan lai dar 1:30-a Rangers leh Borussia Dortmund te inkhel tur hi en châkawm ber a ni thei hial ang.

Scottish club hian first leg-ah Signal Iduna Park an luhchhuah a, team ṭha zawka ngaih Borussia Dortmund 4-2 in an hneh. Rangers hian Germany-ah hnehna hlado chham mah se last 16 an la lut lo a, Ibrox Stadium-ah Erling Haaland a inlan theih a beiseiawm avangin Scottish club hi chak chiang saa dah a la rem lo.

Haaland a dam tawh?
Europa League knockout-ah away goal rule a awm lo a, hei hi Borussia Dortmund vanneihna tur a ni. Chutihrualin German club hian extra time thleng tur pawhin Rangers hi minute 90 chhungin 2-0 tala an hneh a ngai a, attacking football hmuh tur a awm dawn.

Dortmund hian khawvel striker ṭha ber zinga chhal theih Haaland an kawl a, Norwegian striker hian first leg a khel thei lo. Entu ṭhutna aṭangin Haaland-a'n a thlir a, a ṭhiante tlawm lai hmuh hrehawm a tihzia a hmel aṭangin a lang chiang hle.

Kum 21 mi Haaland hian tun season Bundesliga match 14 lek aṭangin goal 16 a khung a, Dortmund tana match 79 a khelhah goal 80 a khung thei bawk. A record thlirin Haaland hi goal khung thei bik a ni tih a chiang a, Rangers tan mangchhia a thlen thei ang.

Dortmund hian Rangers lakah an tho chhuak thei a ni tih pholang turin kartawp khan Borussia Monchengladbach chu 6-0 zetin an sawp. Gladbach an sawp ṭum hian Marco Reus-a'n goal hnih a khung a; Donyell Malen, Marius Wolf, Youssoufa Moukoko leh Emre Can ten goal khat ṭheuh an khung bawk. German club hi second leg khelh hmaa result ṭha an nei hian inrintawkna nasa tak a pe ngei ang.

Rangers ve thung
Steven Gerrard chhuahsan Rangers hi Scottish Premiership-ah che ṭha tawk lo mah se Dortmund laka first leg-a an khelh danah Giovanni van Bronckhorst hote hi dah hniam a rem lo. Amaherawhchu a tawp an la khar miau loh avangin fak chiam erawh a la rem lo.

Rangers hian kartawpah Dundee United an hmachhawn a, 1-1 in an inhnehtawkpui. Tlarhma lamah player ngai chhawr mah se Dortmund laka goal li khung theituten goal khat chiah an khung. A êng zawnga thlir erawh chuan Rangers-in German club lakah goal khung tam an mamawh lo a, goal khata an chak lo a nih pawhin last 16 an lut dawn a, an dinhmun a ṭha hle.

Thlirna Tawi
• Champions League ang thoin Europa League knockout chinah away goal rule a awm lo.
• Tun season-ah Europa League khelh dan phung thlak hret a ni a, second round khelh dan an thlak.
• Europa League group stage-a pakhatnain last 16 an lut nghal.
• Last 16 lut tawh team-te chu Lyon, Monaco, Spartak Moscow, Eintracht Frankfurt, Galatasaray, Red Star Belgrade, Bayer Leverkusen leh West Ham United te an ni.
• Champions League group stage tla thla (pathumna) leh Europa League group stage-a pahnihnaten knockout playoff an khel.
• Zanin hian Europa League knockout playoff second leg hi February 24, Ningani zanah khelh a ni ang.
• Europa League last 16 draw hi February 15, Zirtawpni tlai dar 4:30-ah neih a ni ang. Last 16 first leg leh second leg hi March 10 leh March 17, 2022-ah khelh leh tur a ni.

Europa League
Knockout Playoff
2nd leg : Zanin Inkhel Tur
Dinamo Zagreb 11:15 PM Sevilla
Real Sociedad 11:15 PM RB Leipzig
Olympiakos 11:15 PM Atalanta
Lazio 11:15 PM Porto
Napoli 01:30 AM Barcelona
Real Betis 01:30 AM Zenit
Rangers 01:30 AM Borussia Dortmund
Sporting Braga 01:30 AM Sheriff

1st leg : February 17, Ningani zan
Barcelona 1 - 1 Napoli
BAR : Ferran Torres 59'
NAP : Piotr Zielinski 29'
Zenit 2 - 3 Real Betis
ZEN : Artem Dzyuba 25'; Malcom 28'
BET : Ruido Rodriguez 8'; Willian Jose18'; Andres Guardado 41'
Borussia Dortmund 2 - 4 Rangers
BOR : Jude Bellingham 51'; Raphael Guerreiro 82'
RAN : James Tavernier 38' (P); Alfredo Morelos 41'; John Lundstram 49'; Dan-Axel Zagadou 54' (OG)
Sheriff 2 - 0 Sporting Braga
SHE : Sebastian Thil 43' (P); Adama Traore 82'
Sevilla 3 - 1 Dinamo Zagreb
SEV : Ivan Rakitic 13' (P); Lucas Ocampos 44'; Anthony Martial 45+1'
DIN : Mislav Orsic 41'
RB Leipzig 2 - 2 Real Sociedad
RBL : Christopher Nkunku 30'; Emil Forsberg 82' (P)
RSO : Robin Le Normand 8'; Mikel Oyarzabal 64' (P)
Atalanta 2 - 1 Olympiakos
ATA : Berat Djmsiti 61', 63'
OLYM : Francisco Soares 15'
Porto 2 - 1 Lazio
POR : Toni Martinez 37', 49'
LAZ : Mattia Zaccagni 23'