Napoli mikhual tur Barcelona

FC Barcelona-in Champions League knockout stage an thleng thei lo a, Europa League aṭanga tla thei dinhmunah an ding leh mek. Catalan club hi Stadio Olimpico-ah an lenglut dawn a, zanin dar 1:30-ah Napoli an hmachhawn ang. Europe club langsar pahnih hi Nou Camp-ah 1-1 in an inhnehtawk a, Europa League last 16 lut tur zawk hriatthiam a la har hle.

Xavi hnuaiah Barce-lona an insiamṭha chho a, January transfer a hman ṭhat bawk avangin season ṭantirh aiin an ṭha tawh zawk. Barca hian kartawp khan Valencia 4-1 in an sawp a, Arsenal aṭanga an lakluh Pierre-Emeric Aubameyang chuan hattrick a siam. Nou Camp-a Napoli nena an inhnehtawk ṭuma goal khungtu pawh Manchester City aṭanga an lakluh Ferran Torres a ni.

Barcelona hian Xavi hnuaiah tun hmaa an khelh ṭhin dan passing game an khel leh tawh a, an game pawh a mawi leh tawh hle. Amaherawhchu an ropui lai nena khaikhin erawh a la rem chiah lo a, Lionel Messi leh player ṭha dang an awm tawh lo. Hei vang tak hian tun hmaa an khelh ngai loh avanga nomawi an la chawi lohna Europa League an khelh a ṭul phah.

Catalan club khingpui tur Napoli hian an match hnuhnung pathumah an khingpui 1-1 vekin an inhnehtawkpui. Barcelona bakah hian Italian champion Inter Milan leh Cagliari nen an inhnehtawk. Relegation zone-a awm Cagliari lakah hian siphurh suttu zawk an ni a, Serie A-ah pathumna ni bawk mah se team ṭha chungchuang an ni bik lo.

Italian club tan hian Nigerian striker Victor Osimhen chu rinrawl a ni a; Lorenzo Insigne, Piotr Zielinski leh Elif Elmas ten an thlawp avangin Barca tlarhnung tan fimkhur a ṭul khawp ang. Stadio Olimpico-ah football hmuhnawm a beisei theih ang.