Nungchang mawi lo Zverev an paih

Alexander Zverev chu nimin tlai khan Mexican Open aṭanga paih chhuah a ni. Singles huangah a chak a, doubles an khelh laiin umpire nen an inhnial buai a, a thinrim a insum zo lo - a chet dan mawi lo avang hian tournament aṭanga paih a ni.

Zverev leh a ṭanpui Marcelo Melo te hi Lloyd Glasspool leh Harri Heliovaara ṭangdun lakah 6-2, 4-6, 10-6 in an chak lo. An chak loh danah Zverev a lawm lo a, court chhuahsan pahin umpire ṭhutna chu a racquet hmangin vawi thum lai a vua.

Mipa tennis thuneitu sang ATP chuan Zverev chet dan chu infiammite tih loh tur thil a nih thu an sawi a, ṭawngkam na tak hmang lo mah se atan tournament khelh chhunzawm ve a rem loh thu an sawi bawk.

Thawhlehni tlai khan Zverev chuan singles huangah record a lo siam tawh. Zverev leh Jenson Brooksby te chu keini lama Thawhlehni zan tirah an inkhel zo chiah a, an ram lamah chuan zing dar 4:55 AM a ni hial - tennis inkhela zo tlai ber record an siam.

Champion lai Zverev hian 3-6, 7-6 (12-10), 6-2 in hnehna a chang. Tun hma lama inkhel zo tlai chu zing dar 4:34 AM-ah an zo, tunah chuan record tharin a rawn khum ta chiah a ni. Singles huanga champion lai ni mah se inelna hi a hmachhawn chhunzawm thei dawn tawh chuang lo a ni.

Thawhlehni inkhel dangah John Isner chuan Fernando Verdasco chu 7-5, 6-7 (4-7), 7-6 (7-3) in a hneh, hnehna chang tur hian darkar thum leh minute 14 a mamawh. A match lehpekah chuan seeded parukna Cameron Norrie a hmachhawn leh ang.