Match hnih atan Mourinho an hrem

Jose Mourinho chu red card a hmuh avangin match hnih atan hrem a ni. Portuguese manager hian AS Roma chu Spezia leh Atalanta lakah a kaihruai thei dawn lo tihna a ni a, £16,670 (cheng nuai 16.91) an chawitir bawk.

Inrinni zana Verona leh Roma inkhelh ṭumin Mourinho hian buaina a siam. Referee Luca Pairetto tih el nan phone hmang lem angin a awm der, a tih el chan chu Pairetto hi 2006 khan match-fixing huanga a lo inrawlh tawh vang a ni.

Referee a tih el bakah Mourinho hian ball lain mipui lamah a pet bawk. Italian Football Federation chuan, "Thil tih dan ṭha lo tak a ni a, a nungchang kha a mawi lo bawk," tiin an sawi.

Chelsea, Manchester United leh Tottenham te pawh lo enkawl tawh manager hian media pawh hmachhawn loin Stadio Olimpico a chhuahsan. Serie A-a pariatna Roma tan an manager awm loa match hnih khelh hi a pawi thei dawn.