US hmeichhe team leh mipa hlawh inang dawn
Hmeichhe football-a ram langsar ber pawl USA hmeichhe team-te chuan US Men's national soccer team hlawh ang zat an hlawh ve tawh dawn a, US women's national team (USWNT) hian an ram football-a thuneitu sang ber United States Soccer Federation (USSF) nen inremna an nei thei a ni.
Pawl pahnih inremna ang chuan hmeichhe team-a player-te hian ram tana an fehchhuah leh hlawhtlinna an chanin an ram mipa player-te hlawh ang zat an hlawh ve tawh dawn a, US Soccer hian dollar maktaduai 24 chu tun hmaa hlawh tlem zawk an lo lak reng avangin an pe dawn bawk - he pawisa hi la khel mek leh player chawl tawh zingah dawng tur an awm nual.
United States forward lar Alex Morgan chuan, "Ni duhawm tak a ni a, US Soccer nena kan inkar khi awm reng chu chinfel a ni dawn ta a, keini pawhin kan phu ang ngeia ngaihhlut leh zah hlawh niin kan inhre ve tawh dawn a ni," a ti.
March 2019 khan US hmeichhe team-a tel player 28-te chu hlawh intluktlanna duhin court-ah an lo zualko tawh a, kum 2016 khan Morgan leh Megan Rapinoe telna US hmeichhe player panga chuan hlawha intluktlan duhin US Soccer hi an lo khing tawh bawk.
May 2020 khan court chuan US hmeichhe team-te thil phut hi an lo hnarsak tawh a, US Soccer aṭanga dollar maktaduai 66 dawn an phut tel a ni - court thutlukna hi US hmeichhe team lam hian hrethiam loin an khing nawn.
Mahse, US Soccer lamin pa chan changin, an hmeichhe team-te hi inremna neihpui tumin an dawr a, September, 2021 khan mipa team nena hlawh inang pe turin contract an lo zawrh tawh.
A tawpah chuan court lama inkhin ngai tawh loin an inrem thei ta a, Morgan chuan, "Kan inrem thei hi lawmawm ka ti a, hei hi infiamna khawvela hmeichhiate tana hnehna a ni mai lo a, hmeichhia zawng zawng tan hnehna a ni," a ti.
US hmeichhe team hian kum 2019 khan a vawi kua nan World Cup nomawi an lo chawi tawh a, Olympic hmeichhe football-ah gold medal vawi nga an hlawh chhuak tawh bawk - an record hi a ropui hle.
Ballon d'Or Feminin (2019) dawngtu Megan Rapinoe chuan, "Engtikah emaw chuan vawiin hi kan thlirkir ang a, thil ṭha zawk atana US Soccer inthlak danglam ni tiin kan sawi ṭhin ang," a ti.
Rapinoe chuan sawi zawmin, "Kan hun tawn ang kha chu a thleng tawh lo ang. Tunah chuan hma hun êng taka thlirin, football hi USA-a infiamna ropui ber a nih theih nan hma kan la ang a, ṭhangtharten keini aia hun duhawm zawk an tawn theih nan kan thawk bawk ang," a ti a, a hlim hle.
US Soccer leh USWNT te chuan thuchhuah inṭawm siamin, "Inremna kan nei thei ta hi kan lawm hle a, hlawh inang nei tura buaina rei tak awm tawh chingfelin, football-a intluktlanna a awm theih nan lawm takin kan thawk ho dawn a ni.
"Vawiin hun thlen hi thil awlsam a ni lo. USWNT player-te hian anmahni tan mai ni lo, infiammi lo awm zel turten hlawh chungchanga intluktlanna an neih theih nana thawk reng chungin hlawhtlinna tam tak an chhar a, vawiinah hian USWNT leader hlui, vawiin hun a thlen theih nana thawktute kan hre reng a ni," an ti.