Joan Mir leh Suzuki hun a herchhuak

Joan Mir chu MotoGP 2020 champion a ni chiang ta, intlansiak hmabak pakhat la nei mahse midang tan umphak theih a ni tawh lo. Bike intlansiakna sang berah a champion vawi khatna niin, a team Suzuki pawhin kum 2000 hnua world title an lak lehna hmasa ber a ni bawk.

Pathianni zana tlan zawh tak Valencia MotoGP-ah Mir hi pasarihnaah a thleng, point kua hmuh belhin a point neih belhkhawm chu 171 a ni. Franco Morbidelli-a'n hnehna changin point 138 khawl khawm mah se a pumpuia an inthlauhna hi point 37 zet a ni.

Intlansiak ṭan hmain a mah hnaih bertu Fabio Quartararo nen an inkarah point 37 a awm a, an hnungah Alex Rins a awm bawk. Quartararo-a'n besiei phak loin a tlan tluan thei lo a, point a hmuh belh loh avangin a elpui tan kawng a sialsak.

Kenny Roberts Jr chuan 2000 khan Suzuki bike khalh chungin MotoGP title a lo la tawh, hlawhtlinna an chan hnuhnung ber aṭangin ṭhangkhat lian zet a liam tawh a, tunah chuan hri leng vanga buaina karah par an chhuang ve leh ta.

Spanish tlangval Mir chuan, "Beisei phak bak a sang a ni, hetiang hun duhawm hi thuin ka sawifiah thiam lo. Lawm avanga ṭah tur nge nuih tur tih pawh ka hrethiam lo. Duhthusam kan neih hi ti hlawhtling tura theihtawp kan chhuah chuan a chhanna a awm ṭhin," a ti.

MotoGP huangah Mir hian season hnih chauh hun a la hmang a, inelna hniam zawk Moto2 leh Moto3 huangah sulhnu lo nei ve nual tawh mah se a tan chuan hun rei lo te chhunga MotoGP champion nih mai hi thil mak a tling.

MotoGP leh Marc Marquez hming a inzawm tlat, Spanish rider hian nomawi chawi theih hnuhnung pasarih zinga paruk a la - tun hnaiah phei chuan a zawnin vawi li ngawt a champion. Mahse kuminah erawh intlansiak hmasa berah inhliamin a inlan zui thei tawh lo.

Marquez awm loh karah rider hrang hrang an in chak chhawk. Fabio Quartararo leh Morbidelli vawi thum ve ve an chak, rider dang Brad Binder, Andrea Dovizioso, Miguel Oliveira, Maverick Vinales, Danilo Petrucci, Alex Rins leh Mir te vawi khat ṭheuh an chak bawk.

Mimal kal fal thei an awm lo a, season tluana nghelnghet taka kaltluang thei Mir-a chu a vennei berah a ṭang. Intlansiak vawi 13 an neih chinah pole position chang miah lo mah se dawhsanah (podium) vawi sarih a lawn thei, ani aia lawn hnem an awm lo a ni.

Kum 1997 September 1 khan Palma, Spain-ah a piang a, tunah kum 23 a ni mek. Kum ruk mi chauh a nih laiin bike a nei ṭan, hetih lai hian a patea (uncle) Joan Perello chu 125cc huangah inlanin TV aṭangin a lo en ṭhin.

Valentino Rossi ngaisang chungin a sei lian a, a naupan lai aṭanga a ṭhan hnan bike intlansiak chu a tleirawl hnuah pawh atchilh chhunzawm in a luhchilh zui nghal a, world champion a nih thlengin a hawi kir tawh lo.

Season hmasa khan MotoGP huangah inlan ṭanin, a inthlansiak hmasa berah 12-na dinhmun a luah. Bike intlansiakna sang berah hian a vawi khat nan November 8, Pathianni hmasa a tlan zawh tak European Grand Prix-ah khan hnehna changin, tunah vanneihna a chang chhunzawm.