Elanga-a'n Man United a chhanhim

UEFA Champions League inkhel hmuhnawmah Atletico Madrid leh Manchester United 1-1 in an inhnehtawk. Nilaini zana Estadio Wanda Metropolitano-a inkhelah Joao Felix hmangin mualneituin khung hmasa mah se substitute Anthony Elanga-a'n minute 10 chiah a awm tawh tihin siphurh a sut.

Second leg hi March 15, Thawhlehni zanah khelh a ni dawn. Man United-in khualmuala Spanish champion an draw hram avangin quarterfinal lut turin beiseina an nei sang sawt ang.

Atleti an ṭha zawk
Atletico Madrid-in an mualah bul an ṭan ṭha zawk a, Man United-in right back atana Victor Lindelof an enchhin fuh lohzia a lang hma hle. Minute sarihna lekah Renan Lodi cross ṭha zet chu Joao Felix-a'n dive pahin a tauh goal a, keeper David de Gea dem theih a ni lo. Portuguese forward vengtu captain Harry Maguire erawh dem theih a ni.

Diego Simeone hote hmuhnawm viau mah se De Gea tan hna an siam thei bik lo a, an vanduai tel bawk. Antoine Griezmann-a'n 1-0 a nih laiin crossbar a tauh per a, 1-1 a nih hnuah crossbar a pet per leh bawk.

Danglamna thlentu Elanga
Cristiano Ronaldo-a'n Atletico Madrid lakah record ṭha tak nei mah se goal a khung thei lo. Bruno Fernandes, Marcus Rashford leh Jadon Sancho te goal bawh a na tawk lo bawk.

Minute 75-naah Elanga-a'n Rashford a rawn thlak a, Swedish forward hian ball a khawihna hmasa berah siphurh sutna goal a khung. Bruno Fernandes-a'n minute 80-naah ṭha takin Elanga tan through ball a pe a, Man United rawlthar hian cool takin a khung.

Elanga hi kum 19 leh ni 302 mi a ni a, Champions League-a Man United leh Swedish player zinga goal khung thei naupang ber a ni. German manager Ralf Rangnick chuan, "Man United ka enkawl tirh khan youtube-ah a chevel ka en a, January a nih avangin transfer hunlai a ni a, loan hmangin a chhuak hman ṭep. Amaehrawhchu a theihna ka hmu a, a chhuah ka phal lo," tiin a chelh thu a sawi.

Elanga hi IF Elfsborg, Malmo FF leh Hattersley FC-ah te inzir tawh mah se Man United a zawm hian kum 12 mi chauh a ni a, kum 19 mi niin a thawhrim rah a seng mek.

Rangnick chuan, "Player ṭhenkhat hian Elanga hi entawn se ka duh. Mumang ramah a cheng mek. Training-naa player ṭha ber a ni," tiin a thawhrim ṭhin thu a sawi. Elanga pawhin, "Khelhna hun ka neih apiangin min ringtu coach thungrul ka duh ṭhin. Tun ang hun hi ka lo suangtuah tawh ṭhin a, manager chungah ka lawm takzet," tiin a sawi.

Eng nge an sawi?
Atletico Madrid coach Diego Simeone chuan, "Kan khelh danah ka lungawi. Kan team boruak a ṭha a, team angin kan khel a, pressure ṭha takin kan pe bawk. Tun anga kan khelh zel theih hi a pawimawh a ni," tiin an khelh danah a lungawi thu a sawi.

Player of the match Joao Felix chuan, "Kar liam ta khan training-naah cross kan zir nasa a, kan zir ang chiahin goal ka khung. Season ṭha taka khar turin kan thawhrim a ṭul a ni," tiin a sawi.

Manchester United manager lailawk Ralf Rangnick chuan, "First half kan khel ṭha lo a, ball kan chan khan kan dawih mah mah a ni. Chutihrualin minute 10 chu khel leh ila, kan chak theih hial ka ring," tiin bul ṭan ṭha lo mah se hun tawp lama an khelh ṭhat thu a sawi.

UCL Last 16
First leg
February 15, Thawhlehni
Paris Saint-Germain 1 - 0 Real Madrid
PSG: Kylian Mbappe 90+4'
Sporting Lisbon 0 - 5 Manchester City
MAN: Riyad Mahrez 7'; Bernardo Silva 17', 44'; Phil Foden 32'; Raheem Sterling 58'
February 16, Nilaini
RB Salzburg 1 - 1 FC Bayern Munich
RBS : Chukwubuike Adamu 21'
FCB : Kingsley Coman 90'
Inter Milan 0 - 2 Liverpool
LFC : Roberto Firmino 75'; Mohamed Salah 83'
February 22, Thawhlehni zan
Chelsea 2 - 0 Lille
CHE: Kai Havertz 8'; Christian Pulisic 63'
Villarreal 1 - 1 Juventus
VIL: Dani Parejo 66'
JUV: Dusan Vlahovic 1'
February 23, Nilaini zan
Atletico Madrid 1 - 1 Manchester United
ATM : Joao Felix 7'
MNU : Anthony Elanga 80'
Benfica 2 - 2 Ajax
BEN : Sebastien Haller 26' (OG); Roman Yaremchuk 72'
AJX : Dusan Tadic 18'; Sebastien Haller 29'

Second Leg
March 8, Thawhlehni zan
Bayern Munich 01:30 AM RB Salzburg
Liverpool 01:30 AM Inter Milan
March 9, Nilaini zan
Manchester City 01:30 AM Sporting Lisbon
Real Madrid 01:30 AM Paris Saint-Germain
March 15, Thawhlehni zan
Manchester United 01:30 AM Atletico Madrid
Ajax 01:30 AM Benfica
March 9, Nilaini zan
Juventus 01:30 AM Villarreal
Lille 01:30 AM Chelsea

* UCL-ah away goal rule a awm tawh lo.
* Second leg hi March thlaah khelh a ni ang.
* Quarterfinal aṭangin draw neih ṭhat leh tur a ni a, tute pawh an inhmachhawn thei ang.