Nadal a chak phawt

Rafael Nadal-a'n a vawi khat nana ATP Finals nomawi chawi a tumna kawngah bul a ṭan fuh, a match hmasa berah Andrey Rublev a hneh - zanin dar 7:30 hian Dominic Thiem nen group match an khel leh nghal ang.

Pathianni zan khan O2 Arena, London-ah inelna bul ṭan niin, world number 2 Nadal hian 6-3, 6-4 in hnehna a chang. Russian tlangval Rublev hi a vawi khat inlanna chauh a ni a, atan Spanish tlangval Nadal hi a thiam mah mah.

Kum 34 mi Nadal chuan, "Hnehna ka chan avangin ka lawm hle, ka chak avangin inrintawkna ka neih belh bakah beiseina chu a nung reng bawk. Match khelh leh turah erawh Dimonic a nih dawn avangin a hautak hle ang," a ti.

Grand Slam vawi 20 champion tawh Nadal hian ATP Finals nomawi hi a la chawi lo, kum 2010 leh 2013 khan final chu lut thei mah se a vanduai zawkah a ṭang; kumin hian hlawhtlin ngei a tum ruh hle.

Group match inkhel dangah Dominic Thiem chuan 7-6 (7-5), 4-6, 6-3 in champion lai Stefanos Tsitsipas a hneh thung. Greek tlangval Tsitsipas-a'n khel ṭha thawkhat viau mah se US Open champion Thiem a chesual duh lo a, inkhel inhnehtawk takah a vannei zawkah a ṭang.

Kum 22 mi Tsitsipas chuan, "Season hmasa kha chuan a hmunah entu mipui an awm a, a boruak a nuamin inkhelh pawh a phurawm hle. Kuminah erawh stadium ruak chhunga inkhelh chu hriatthiam a har," a ti. Zanin dar 1:30-ah Tsitsipas leh Rublev an inkhel ve leh thung dawn a ni.

Mipa tennis thiam zual pariat inelnaah hian player inlante chu group pahnihah ṭhenhran an ni a, nizan khan group pakhat zawk inlanin result kan hre hman lo. A sang paliin semifinal an khel chhunzawm leh ang.