Goal khung thei Haller

Benfica leh Ajax te Nilaini zan khan Estadio da Luz-ah 2-2 in an inhnehtawk. Tun season Champions League-a goal khung tam ber ni mek Ajax striker Sebastien Haller chuan an lamah a tih luh bakah an khingpuite goal-ah a khung bawk.

Ajax-in captain Dusan Tadic hmangin hma an hruai a, an striker chhuanvawr Haller-a'n an lamah tilut mah se Ivorian striker hian hmahruaina goal a khung lehnghal tho. Hun tawp thlengin inkhel a nung a, mualneitu Benfica-in Roman Yaremchuk hmangin siphurh an sut a, 2-2 in inkhel a tawp.

Mi thar Haller
Kum 27 mi Sebastien Haller hian kum 2019 khan West Ham player man to ber ni turin pound maktaduai 45 vel zetin Eintracht Frankfurt aṭangin London club a zawm. Hammers tan season khat leh a chanve chhungin league-ah goal 10 chauh a khung.

English club-ah beisei a phak loh avangin Ajax a zawm a, mi thar 'Haller' hmuhin a awm. Ivorian striker hian league-ah goal 11 a khung nghal a, hming a chherna tak erawh tun season Champions League a ni.

Haller-a tan tun season hi UCL-a a inlanna hmasa ber a ni a, goal 11 khungin top scorer a ni mek. Player langsar Robert Lewandowski (9), Mohamed Salah (8), Cristiano Ronaldo (6), Lionel Messi (5) leh Kylian Mbappe (5) te aiin a khung tam a, player ṭha dang goal khung zat thlirin Haller hnathawh ropuizia a lang.

Ram hmangaihna
Russia leh Ukraine buaina a lian chho zel a, player-te pawhin khelmualah an ram an hmangaihna a pholang. Benfica tan Ukrainian striker Roman Yaremchuk-a'n minute 72-naah siphurh sutna goal a tauh lut.

Yaremchuk hian a goal khung lawm nan a jersey a phelh a, a hnuaia kawr hakah chuan fiah takin Ukrainian Association of Football logo a awm. An ram a thlawp tih lantirnaah a ngaih theih.

Benfica leh Ajax hian March 15, Thawhlehni zan hian Amsterdam-ah second leg an khel dawn. Away goal rule awm loh avangin khualmuala goal hnih khungtu Dutch club dinhmun a ṭhat phah loh.