Mizo mipuiin Mizo boxer an thlawp a ngai - Kamal
February 26, Inrinni zan hian Dubai-ah Mizo boxer-te an inlan dawn a, 'India Vs Pakistan' hming vuahin thawm an nei ring hle. Boxing inelna buatsaihtu Grassroot Boxing Promotions & Management chuan Mizo boxer-te hlawh ṭha tak an pe a, Grassroot Boxing dintu Mujtaba Kamal chuan Mizo mipuite thlawpna an mamawh thu a sawi.
Boxer lawmman
Grassroot Boxing Promotions & Management-in Mizo boxer ṭha pali Lalrinsanga Tlau, Nutlai Lalbiakkima, HC Johnkenty Vanhlimpuia leh Laldingliana te an hnuaia an awm theih nan inremna an neihpui. Mizo zinga professional boxer hmasa ber Sangtea hian tun ṭumah hian dollar 3,100 (Rs 2,31,802.50) a hlawh dawn a, PPV aṭangin 8% a chang bawk ang.
Siaha boxer NT-a hian Thai boxer Gerrtipong Kumsahwat a hneh ṭum khan dollar 2,000 (Rs 1,49,550) a hlawh. Tun ṭumah hian dollar 3,000 (Rs 2,24,325) a hlawh dawn a, PPV aṭangin 7% a chang dawn.
Johnkenty tan professional fight hmasa ber tur a ni a, dollar 1,500 (Rs 1,12,162.50) hlawh tur leh PPV aṭanga 7% chang turin inremna an siam a, amaherawhchu Tuipui tlangval hi a hnathawhna Indian Navy-ten phalna an pek loh avangin a inlan dawn lo.
Sangtea leh NT-a ten round ruk an fight dawn a, Tuipui boxer Laldingliana'n round li a fight thung ang. Dinga hian dollar 1000 (Rs 74,775) a hlawh dawn a, PPV aṭangin 2% a chang bawk ang.
Mipui a ngen
Grassroot Boxing dintu Mujtaba Kamal chuan, "Mizo mipuiten boxing an tuizia kan hmu a, beiseina sang tak kan nei. Sum ṭhahnem tak hloh huamin Mizo boxer-te sum ṭhahnem tak kan pe dawn. Mizo mipuiten boxing chawisan nan Mizo boxer-te inhnek an thlir hi a pawimawh," tiin a sawi.
Grassroot Boxing hian Mizo boxer lawmman atan nuai nga bawr vel an seng dawn a, hei bakah hian Dubai an zinna leh an thlenna hotel zawng zawng an tum sak vek dawn bawk.
Mujtaba Kamal chuan, "Promoter nih dawn chuan risk lak a ngai a, chutihrualin hloh chunga kal reng erawh a theih loh. Chutihrualin Mizo boxer-te tana theithawp chhuah zel kan inhuam a, Mizo mipuite puihna kan beisei a ni," tiin Vanglaini a hrilh.
Hmabak êng Dinga
Professional boxing-ah Sangtea leh NT-a ten hming an chher a, hlawhtlinna tak tak chang turin kawng thui tak la zawh ngai mah se an thlen chin pawh a sang ta hle. Professional fight vawi hnih hmachhawn tawh Dinga chungah Kamal-a'n beiseina sang tak a nei.
Mujtaba Kamal chuan, "Dinga hi a khel a hmuhnawm ka ti a, beiseina ka nei sang. NT-a leh Sangtea te ṭhatzia ka hria a, chuti chung chuan kei chuan Dinga inhnek hi ka thlir châk chu a ni," tiin a sawi.
Tuipui tlangval Dinga hian professional fight a hmachhawn hnuah Shubham Chauhan leh Rohit te chu knockout ve ve hmangin a hneh a, tun ṭumah hian Pakistan boxer Muhammad Ammar Khan a hmachhawn ang.
Inhnek hi pay-per-view hmanga en tur a ni dawn a, Zonet kaltlanga en duh tan mahni veng distributor-te hnenah Rs. 100 pekin a en theih ang a, online aṭanga en duh tan Zonet Empai application kaltlangin a en theih dawn a, Empai bikah hian online kaltlangin pawisa pek tur a ni.