Kyrgios-a'n depression neite a fuih

Tennis star Nick Kyrgios chuan depression a neih ṭhin tawh thu a sawi rualin tuna nei mekte chu an mal loh thu leh anmahni tana a inhawn reng thu a sawi.

Kum 26 mi Kyrgios chuan, "Kum thum liam ta khan tumah ka ring ngam lo a, ka harsatna pawh ka hrilh hek lo. Ka harsatna hi ka inbun ruah loh vang a ni. Mipui ṭhahnem tak hmaa ka inkhelh pawhin ka mal em em a, khum aṭanga thawhchhuah pawh ka harsat.

"Ka mal ngawih ngawih a, ka lungngai a, damdawi leh zu ngawl ka vei a, ka chhungte leh ṭhiante lak aṭangin ka inthiar fihlim bawk," tiin tun hmaa a harsatna a sawi lang.

Kyrgios hian kum 2018 aṭangin psychologist a pan a, rilru lama harsatna pawh a hneh phah. Australian tennis star chuan, "Ka tawn tawh a nih avangin ka hrechiang. Harsatna kan sawi chhuak a nih chuan chak lo ta riaua inhriat leh hlauhna a awm.

"Ka sawi duh chu, mal ngawih ngawiha inngaih kha a pawi lo. Khawngaih takin mal angah inngai lo ula, midang biak hrehna in nei a nih chuan in tan ka inhawng reng e," tiin puih a inhuam thu a sawi chhuak.