Quarterfinal-ah Nadal a lut
Rafael Nadal chuan tennis a khelh hun chhunga season bul a ṭan fuh ṭum a tawng mek, kumina match 12 a khelh tawhah hnehna a la chang vek - Spanish star hi kum 35 mi a ni tawh.
Nimin Mexican Open last 16 inkhelah Nadal hian Stefan Kozlov chu 6-0, 6-3 a sawpin quarterfinal a inhlangkai. Kuminah hian hard court inelna chauh a la hmachhawn, tournament a khelh hmasak zawk Australian Open-ah khan a lo champion tawh bawk.
Grand Slam vawi 21 champion tawh Nadal chuan, "Straight set hmanga hnehna chan hi chu a lawmawm, hnehtu nih hi chu engtik lai pawhin a lawmawm bawk," a ti. Semifinal lut tur chuan Tommy Paul a hneh leh a ngai dawn.
Kum 2014 kha Nadal-a'n a match hmasa 11-ah hnehna a chang vek a, season bul a ṭan ṭhat ber ṭum a ni. Hun rei tak hnuah a record hmasa hi a khum ta chiah, a aia thui kal zel a duh ngei ang.
Inkhel dangah world number 2 Daniil Medvedev a chak bawk. Russian star hian Pablo Andujar chu 6-1, 6-2 a hnehin quarterfinal a lut ve vawk a, vawiin hian Japanese tlangval Yoshihito Nishioka a bi tum leh dawn.
Medvedev hian Mexican Open nomawi hi a chawi a nih chuan Novak Djokovic tlan pelin world number 1 a ni ang. Ranking sang ber ni turin match thum chak a la hmabak tihna a ni a, a hnai sawt tawh hle. Ranking lama Medvedev elpui Djokovic hi Dubai Tennis Championship lamah a inlan thung.
Mahse, champion a awlsam dawn lo. Nomawi chawi tur chuan Nadal a paltlang a ngai dawn, Spanish star nen hian Australian Open final-ah khan set nga an lo khel tawh, player pahnih hi an chak zel a nih chuan an intawn ngei a ngai dawn a ni.
Inkhel dangah world number 4 Stefanos Tsitsipas chuan JJ Wolf chu 6-1, 6-0 hnehna chang turin minute 47 chauh a hmang a, tournament khelh laia match rei lo ber record an siam - Greek tlangval hian Marcos Giron a hmachhawn leh ang.
British number 1 Cameron Norrie pawhin hnehna a chang. Norrie hian American tlangval, service nei ṭha tak John Isner chu 6-7 (2-7), 6-3, 6-4 in a hneh hram, quarterfinal-ah chuan Peter Gojowczyk nen an inhmachhawn ve leh dawn a ni.