Leeds sawptu Liverpool-in Man City an hnaih

Liverpool-in Premier League champion an la tum reng tih an pholang nawn a, Nilaini zan khan Leeds United chu 6-0 ngawtin an sawp - point thum chiahin hmahruaitu Manchester City an hlat ta.

Reds tan Mohamed Salah chuan penalty hmangin goal hnih a khung a, Sadio Mane-a'n goal hnih a khung a, Joel Matip leh Virgil van Dijk ten goal khat ve ve an khung bawk.

Liverpool boss Jurgen Klopp chuan, "Kartawp thleng bak kan inkar hi point thum a ni dawn lo. City an chak leh ngei ang a, point ruk bawkin kan inthlau leh ang. Kan match zawng zawnga kan chak chuan chance a awm mahna," a ti a, a ṭawng fimkhur hle.

Merseyside club hian Pathianni zan dar 10:00-ah Chelsea nen League Cup final an khel zui dawn a, Blues tan an khingpui turin awlsam taka Leeds United an hneh lai lo thlir hi a nuam lo ang.

Salah a awm
Liverpool fan-ten an thiampuipa Salah chawimawi nan hla engemaw zat an nei a, chung zinga lar tak pakhat chu,"Salah kan nei alawm," tih hi a ni a, Leeds lakah Reds-in Salah an nei tih a lang leh ta.

Egyptian forward hian minute 15-na leka Stuart Dallas handball vanga an penalty hlawhchhuah chu goal-ah a chantir a, Luke Ayling-a'n minute 35-naa Mane laka a foul avangin penalty a chawi zui a, hei pawh Salah hian harsatna nei loin a khung.

Salah-a'n a goal khung karah Joel Matip khung tur a siamsak bawk a, December 2020 hnua a vawi khat nana goal khungtu Matip-a goal hi striker goal niawma mawi a ni.

Kum 29 mi Salah hian tun season inelna hrang hrangah match 31 khelin goal 27 a khung a, assist vawi 10 a nei bawk - Premier League bikah goal 19 khungin top scorer a ni mek a, assist lamah pawh Trent Alexander-Arnold nen vawi 10 ve ve neiin anni aia assist ngah an awm rih lo.

Nghilh loh tur Mane
Liverpool-in Salah an neih miau avangin a langsar ber lo thei ṭhin lo a, Mane-a'n a phu ang tawkin fak a hlawh lo - Nilaini zanah pawh Senegalese forward a hmuhnawm leh pek a, goal hnih a khung bakah penalty a hlawh chhuak.

Jurgen Klopp-a'n hliam vanga Roberto Firmino leh Diogo Jota a chhawr theih loh avangin Salah, Mane leh Luis Díaz a inkawptir a, Mane-a'n tlarhma laiah hun a hmang.

AFCON champion hlim Mane hian goal khung lawk lo mah se minute 80 hnu lamah goal hnih a khung - a goal hmasa zawk luh theih nana Salah leh Jordan Henderson te nena ball an inpe chu mit titlai a tling.

Mane hian minute 90-naah a goal hnihna a khung a, Divock Origi-a shot tur Leeds keeper Illan Meslier-a'n a lo bawh per chu vengtu nei lo Mane ke bulah tlain, goal-ah a chantir chiang hle - AFCON hnua league match thum a khelhah goal thum a khung tawh.

Goal ruk
Mane-a'n goal ngana a khung hian minute 90 a nih tawh avangin goal dang a luh a rinawm loh. Mahse, Liverpool-in an lo la duhtawk hauh lo - Van Dijk chuan hun pek belh minute thumnaah Andy Robertson-a corner chu a tauh lut a, 6-0 zetin an chak.

Liverpool hian November 2016 khan Watford chu mikhualin, 6-0 ngawtin an lo sawp tawh a, Leeds laka goal ruk an khung hi Watford hnua Premier League match khata goal an khung hnem leh ber record a ni.

Reds hian league match ruk zet chu a zawnin hnehna an chang ta a, tun season Premier League-ah goal 70 khungin goal 20 chiah an chhuah a, tun season Premier League-ah anni aia goal khung hnem an awm rih lo.

Klopp-a enkawl Liverpool hian +50 goal difference an nei a, an elpui City erawh +46 a ni thung - Premier League a ngaihnawm zel dawn tih a chiang.

A 'hot' tual tual
Liverpool leh Man City ten match 26 ve ve khel tawhin an inkarah point thum chiah a awm a, Etihad Stadium-ah an la intawng leh dawn bawk - Reds tan champion kawng a inhawng zau ta hle.

Klopp chuan, "Pawn aṭanga thlirtute tan chuan point 20 emaw 30 emawa inhlat ai chuan point thum emaw point ruk leka inthlauh hian league chu a tingaihnawm zawk ang chu. Mahse, team ṭha tak tak kan la hmachhawn dawn a, kan chak vek a ngaih dawn bawk avangin a harsa khawp ang," tiin a ṭawng uang duh lo.

Mahse, German coach hian, "Kan theihtawp erawh kan chhuah ang," a tih zui avangin Premier League nomawi inchuh boruak a 'hot' leh ta sawt. City-in January 15-a Chelsea an ngam hnu khan, match hniha khel tam chungin Reds hi point 14-in an tlansan hman a, tunah erawh an inkar a zim ta hle.

German manager Klopp chuan, "League match dang khelh leh hmain ni 10 a la awm dawn a, mahse, hetih chhung hian inelna dang pahnih khelh a ngai - pakhat chu League Cup final a ni a, pakhat chu FA Cup last 16 a ni thung. Inelna inang lo tak a ni a, hei pawh kan thlir tel a ṭul," tiin hmabak a awlsam loh thu a sawi.

Leeds hmabak
Liverpool-in an chak avangin champion an sawi ri a, Leeds erawh relegate thei dinhmunah an ding ta - an hmabakah Tottenham Hotspur, Leicester City, Chelsea, Manchester City leh Arsenal te an la awm avangin English top flight league-a inhamtan a awlsam dawn lo.

Leeds boss Marcelo Bielsa chuan, "Tla thei dinhmunah kan ding a, kan result hian min ti lungngai ta hle. Liverpool nen kan inkar a zau hret a, kan sawr zim thei ngang lo a ni," a ti.

January 16-a West Ham an hneh hnuah Leeds hian league match nga khelin chak an nei tawh lo a, Aston Villa an inhnehtawkpui tih loh chu an tlawm vek.

Hetihrual hian Leeds hian season hmasaa goal 17 khungtu Patrick Bamford, England midfielder Kalvin Phillips leh captain Liam Cooper chu hliam vangin hun rei zawk an chhawr thei lo a, chhuanlam tur an nei ṭha.