Spurs manager a bang hreh lo!
Antonio Conte chuan Tottenham Hotspur chet fuh theih loh chhan chu amah a nih chuan ban mai a hreh lo tih a sawi. Italian manager hian nikum November thlatir aṭang khan North London club hi a enkawl ṭan ve chauh.
Spurs hian tun hnai Premier League an khelh hnuhnung pangah vawi li ngawt an tlawm! Nilaini zan khan table mawng lama awm Burnley chu 1-0 in an hneh lo, goal awmchhun hi minute 71-naa Ben Mee khung a ni.
A lawm lo
Italian manager Conte hi mahni thu duh leh luhlul tak mai a ni a, a duh anga thil a thlen loh chuan zahpah a nei ngai vak lo. Burnley an ngam loh hnuah pawh a thinrim a insum zo lo, ban a ṭul a nih chuan a ban hreh loh thu a sawi hmiah.
Kum 52 mi Conte chuan, "Tottenham tih hmasawn tumin ka lo kal, buaina chhan hi keimah ka nih chuan inthiarfihlim turin ka inpeih, hemi kawngah chuan buaina a awm lo ang," tiin inkhel chanchin aiin club chhung thil a sawi.
Spurs manager chuan sawi zawmin, "Ni khatah darkar 20 chhung Tottenham tan hun ka hmang, a dang darkar li chauh ka mu. Club thuneitute ka hmu a, thawkrim hle mah ila danglamna thlen turin a tawk zo rih chuang si lo.
"Khel ṭhain inpe hlawm viau mah ila kan chak lo bawk si, league match vawi nga a ṭum li chak loh chu chhiatna nasa tak a ni. Club lamin eng ang nge an duh tih sawiho turin kei chu ka inhawng reng," tiin a sawi.
A chiang lo
Tottenham hi Premier League table-ah pariatna an ni mek. Champions League khel phak china awm Manchester United an phak lohna chu point sarih a ni a, a sang pali zinga tel phak tur chuan an elpui club dangte chetsual an chan tel a ngai dawn.
Conte chuan, "A nihna tak sawi chuan, tun hnai kan match hnuhnung pangah hi chuan tlak hlaua khel ang mai kan ni. Eng emaw dik lo chu a awm chiang. Kan khelh danah chuan ka mawhphurhna a ni a, tun ang dinhmunah hi chuan hlawh lak pawh a nuam lo.
"Spurs ka enkawl tirh aṭang khan hmasawn tumin ka bei. Mahse, tuna a lan dan chuan 10, 12, 13-na ni chung pawhin season kan khar thei. He hmun ka lo kal tirha kan awmna kha a ni," tiin zep nei miah loin an dinhmun ṭhat loh thu a sawi.
North London club hian tun kar tawpah Leeds United an hmachhawn dawn. Leeds i la hmachhawn dawn em? tia zawhna chu Conte hian a chhang duh lo a, a bang dawn nge team a enkawl zui dawn tih pawh a sawi duh tawh rih lo a ni.
Antonio Conte leh Spurs
Kum 2021
02 November Conte chu Tottenham manager atan ruat a ni a, kum 2023 thleng daih contract a ziak.
07 November An match hmasa berah Everton nen 0-0 in an inhnehtawk, a naute rilru put hmanga a lungawi thu a sawi.
01 December Europa Conference League-ah NS Mura an hneh lo. Manager a nih hnuah Tottenham din thar leh chu chona hautak ber a nih tur thu a sawi.
19 December Liverpool nen 2-2 in an inhnehtawk a, point khat chauh an hmuh vangin Conte a lawm lo.
Kum 2022
03 January Spurs chuan Watford a hneh, league-ah a zawnin match riat chhung tlawm nei loin an kal.
21 January Spurs manager hian thlasik bazara a player lak duhte chu club lamin ngaihtuahsak se a duh.
23 January Chelsea an ngam lo, club lian dangte leh Spurs inkar chu zau a ti hle.
31 January Spurs chuan Juventus player pahnih Rodrigo Bentancur leh Dejan Kulusevski an lalut. Mahse, player pali lai an chhuah tir thung - an zingah Dele Alli pawh a tel.
04 February Conte chuan transfer chungchangah tihsual neih tawh loh a duh thu a sawi a, thuthup takin bazar dana thuneih tel a duh thu a sawina a ni.
13 February Wolves lakah 2-0 in an tlawm a, hmasawnna kawng zawh tur an la nei thui hle tih a sawi.
17 February Sky Sports Italia hnenah Tottenham chu thlasik bazara an chet chhiat thu a sawi.
18 February Conte-a'n media ho a sawisel, an thu chhuah chhawn duh dan chu buaina siam tumah a puh.
19 February Juventus, Chelsea leh Inter Milan manager hlui chuan, Tottenham player-te chu team a enkawl tawh zinga ṭha ber an nih thu a sawi. Manchester City 3-2 a an hneh hlim a ni.
23 February League match hnuhnung pangaa a vawi li nan an chak lo, an buaina chu amah vang a nih chuan ban mai pawi a ti lo.