Hyderabad tan semifinal hmun a chiang ta

Kerala Blasters midfielder K. Lalṭhathanga'n league hmahruaitu nichunga season khar an tum thu Vanglaini a hrilh a, mahse, Puitea sawi angin thil a thleng dawn lo niin a lang ta.

Nilaini zan khan Indian Super League inkhelah Hyderabad chuan 2-1 in Kerala Blasters an hneh a, palina aia hniama an awm theih tawh loh avangin semifinal an khel dawn tih a chiang tawh.

Hyderabad tan Bartholomew Ogbeche leh Javier Siverio ten goal khat ve ve an khung a, Blasters tana hun pek belha Vincy Barretto goal khung chu scoreline timawitu mai a ni - Kerala tan Lalṭhathanga a khel tluan a, a team tan danglamna erawh a thlen thei bik lo.

A hming Ogbeche
Team pahnih an fimkhur a, an duh angin an innawr ngam lo ve ve - mahse, minute 28-naah player ṭha bik danglamna hmuh tur a awm a, Nigerian striker Ogbeche a inlar.

Nigeria tana vawi 11 inlan tawh striker hian Rohit Danu-a ball tauh chu lo changin, a vir kual pui hnuah goal zawnah a pet a, a goal - tun season ISL match 17 a khelhah goal 17 a khung tling tawh a, assist vawi khat a nei bawk.

Blasters-in minute 41-naah si phurh an sut teuh hle. Harmanjot Khabra corner aṭanga ball kal chu Adrian Luna chuan lo tauhin, Hyderabad keeper Laxmikant Kattimani chuan a lo dang per - a per lehlam hi Chencho Gyeltshen ke bulah tak a tla a, mahse, Bhutanese forward hian crossbar a tih per.

Kerala an vanduai?
1-0 a an hnufual hnuah Blasterts an hlauhawm sawt a, a hrechiangtu chu Hyderabad tlarhnung an ni. Kerala club tan Chencho chuan chance nei leh mah se Kattimani bawk a paltlang thei lo!

Khabra chuan Blasters tan si phurh sutna remchang nei bawk mah se bar a tih per a, Hyderabad tana Ogbeche leh Danu goal khung tura lang Blasters keeper Prabhsukhan Singh Gill-a'n a dan pawh a ṭha dun hle.

Mahse, Hyderabad an buai phah lo. Nikhil Poojary chuan minute 87-naah Siverio tan a siamsak a, kum 24 mi Spanish forward hian chak nemnghehna goal a khung - Blasters tan Barretto chuan hun pek belhah khung ve leh mah se awmzia erawh a nei phak lo.

Hlimna ni ropui
Hyderabad coach Manuel Marquez chuan, "Season hmasa khan semifinal luh phu chungin kan lut thei lo a, tun season-ah erawh a sang pali zinga kan tel tak avangin kan hlim takzet a ni. Player leh coaching staff zawng zawng tan he hlawhtlinna hi ka hlan e.

"Inkhelh zawhah khan min lawmpui turin Kerala Blasters coach chu kan dressing room-ah a rawn lut a, hetiang ang coach hi ISL-in a mamawh chu a ni," tiin an khingpui coach a fak zui - Hyderabad-in match hnih chiah khelh tur an nei tawh a, Jamshedpur leh Mumbai City ten an la hmuak.

Kerala an tlawm avangin table-ah pangana an ni a, semifinal khel turin an dinhmun a derthawng ta hle - chutihrual chuan match thum khelh tur an la nei a, thil tam tak a la inthlak danglam thei tih hriat a ṭha.

Hello top four
Hyderabad-in a vawi khat nan ISL semifinal an khel dawn a, coach Manuel chuan, "Hyderabad chanchina a vawi khat nan playoff kan khel dawn a, mahse, tun hnai kan match ṭhenkhatah a aia ṭha zawkin kan khel thei ang tih chu ka hria.

"Zaninah pawh inkhel kan thunun a, mahse, Blasters khan chance an nei fo. Hun tawp lama goal chhuah a pawi a, tuna pawimawh ber erawh top four kan inhlangkai hi a ni," a ti.

Hyderabad tana Ogbeche ṭangkaina lam hmaih a thiang lo. Paris Saint-Germain striker hlui hian 2018-19 season-a ISL a rawn pan hnuah league match 74 khelin goal 52 a khung a, assist vawi sarih a nei - Hyderabad-in ani an neih avang hian hmahruaitu ni chunga league round khar an mitthla ngam hial ang.