Palace an chak ve ta

Crystal Palace chuan kumina a vawi khat nan Premier League-ah hnehna an chang ve ta. Palace hian Nilaini zan inkhelah Watford chu 4-1 in an luhchhuah a, khualmualah point thum hlu tak an hlawh chhuak.

Watford hi table mawng lama talbuai lai an ni a, a hniam ber dawt an ni. Vicarage Road-a inkhelah mikhual tana Jean-Philippe Mateta goal khung chu Moussa Sissoko hmangin an sut a, point khat hmuh beiseina an nei ve hman.

Mahse, Patrick Vieira nauten chak ngei an duh - Conor Gallagher hmanga hma an hruai belh hnuah, forward Wilfried Zaha chuan goal hnih khung belhin an chak, point 29 an hmuh avangin table-ah pawh 11-na dinhmun an luah chho thei leh ta.

Palace manager Vieira chuan, "Inrintawkna neih let leh theih nan hnehna chan hi a pawimawh hle. Ka naute hian khel ṭha viau ṭhin mah se goal khung kan harsat a, tun ṭumah erawh a hmawr kan bawk fuh ta.

"Goal li kan khung bakah keimahni goal kan ven dan kha a lawmawm, goal tam zawk khung thei tura remchang kan insiam thei te kha a lawmawm zual lai chu a ni," tiin a sawi a, a naute khelh danah a lungawi hle.

Watford chhanhim tura beisei Roy Hodgson tan erawh hna a la harsa rih hle. English manager chuan, "Kan danglamna chu penalty box chhunga kan chet danah a ni, kan tlarhma lam hriam tawk lo deuh kha a pawi," a ti.

Hodgson-a naute hian match 25 aṭangin point 18 an hmu a, a him china awm Newcastle United an phak lohna chu point li a ni. Magpies aiin match khatin an khel hnem zawk a, inhamtang tur chuan hna a hautak tawh dawn.