Mascherano-a'n boot a khai

Javier Mascherano chuan football khelh a chawlhsan thu a puang. Barcelona leh Liverpool midfielder hlui hian a hun hnuhnung chu Argentine club Estudiantes tan a hmang a ni.

Kum 36 mi Mascherano chuan, "Football khelh ka chawlhsan tih ka puang, kan rama hun hnuhnung ka hman theih nana remchang min siamsaktu Estudiantes chungah ka lawm," a ti. An ram Argentina tan match 147 ngawt a khel a, ani aia inlan hnem an awm lo.

Argentine club River Plate aṭanga bul ṭantu Mascherano hi midfielder ni mah se tlarhnunga khel tur pawhin a ṭha tawk. Rin loh taka West Ham a pan hnuah Liverpool a zawm leh a, Reds tan Premier League match 94 a khelh hnuin La Liga khel turin Barca a zawm.

Catalan club tan hian a vanglai hun a hmang a, hlawhtlinna pawh a chang hnem. La Liga leh Copa del Rey panga ve ve, Champions League pahnih bakah UEFA Super Cup leh FIFA Club World Cup pawh vawi hnih ve ve a chawi bawk.

Spanish club lian Barca pawhin thlahna thu sawiin, "Football tana i sulhnu ropui hi a hlu kan ti, a bik taka Barca tana i hnathawh avangin kan lawm. Engtik lai pawhin kan zinga mi i ni reng tawh ang," tiin an midfielder hlui an thlah.