Mitrovic-a'n record thar a siam

Fulham striker Aleksandar Mitrovic chuan Peterborough United lakah goal hnih a khung a, Championship season khata goal khung hnem ber record thar a siam - tun season-a goal 33 a khungna chiah a ni.

Fulham hian Nilaini zan khan Championship match-ah Peterborough United chu 2-1 in an hneh a, Mitrovic hian minute 28-naah penalty hmangin a khung phawt a, minute 62-naah a belhchhah leh bawk.

Peterborough tan Jack Marriott chuan minute 89-naah khung ve leh mah se awmzia a nei phak lo. Fulham-in hnehna an chan avangin match 32 an khelhah table chung ber an luah mek a, anmahni hnaih bertu Bournemouth aiin point kuain an hmu sang zawk a, match hnihin an khel tam thung.

Kum 27 mi Mitrovic hian tun season Championship-ah match 30 khelin goal 33 hi a khung a, season hmasa lawka Brentford tana goal 31 khungtu Ivan Toney record siam chu a khum chiang hle.

Championship-ah match 46 khelh a ni ṭhin a, Mitrovic hian match 14 khelh tur a la nei tihna a ni a, Newcastle United striker hlui hian Championship-a goal 40 khung tling hmasa ber record a siam a nih pawhin a mak lo ang.

Fulham boss Marco Silva chuan, "A number en ula, a chiang maiin ka hria. February thla tawpah goal 33 a khung tling der a, match 14 kan la hmabak zui - ropui tak a ni.

"Mitrovic ka duhna em em chu a aia ṭha zawk a beisei zel hi a ni a, naktuk aṭang chuan a lak aṭang hian a aia ṭha zawk ka beisei leh ang tih pawh a hria. Mitro-a number hian kan duhdan leh player-ten chumi an tihhlawhtlin dan chu a pholang - thil pawimawh tak he club-ah hian din kan tum a ni," tiin a sawi.