Premier League player langsar inhliam

International match a awm avangin kar tawpah Premier League inkhel en tur a awm lo a, chutihrualin English club ṭhaa khelte ram tan an inlan thung. Nations League hi friendly match u awrh a nih avangin sawi zui a hlawh tawk lo a, media lamin an ngaihven erawh player inhliam te an ni.

Player langsar inhliam zingah Liverpool defender Joe Gomez leh Andrew Robertson an tel a, Manchester City player pahnih Raheem Sterling leh Nathan Ake bakah Chelsea defender Ben Chilwell a tel. Jurgen Klopp-a harsatna belhchhah turin Mohamed Salah-a'n Covid-19 a kai a, Manchester United player thar Alex Telles pawhin coronavirus a kai leh bawk. 

English defender Gomez a inhliam rei dawn a, Robertson erawh tunkar tawpa inlan turin beiseina a la awm. Scotland-in Euro 2020 playoff-a Serbia nen an inkhelh ṭumin a malpuiah hliam tenau a nei a, hei vang hian penalty a pet lo. Liverpool defender hi Pathianni zana Scotland-in Slovakia 1-0 a an hneh loh ṭumin a inlan lo a, Nilaini zana Israel nen an inkhelh hunah pawh a inlan lo ang.

Reds hian Pathianni zanah Leicester City an mikhual dawn a; Gomez, Salah, Trent Alexander-Arnold leh Virgil van Dijk te an khel thei dawn lo. Thiago Alcantara leh Robertson te dinhmun an ngaichang mek. 

Chelsea tana tun hnaia khel ṭha Ben Chilwell pawh England leh Belgium inkhelh ṭumin a hnungah hliam a nei a, Inrinni zana Newcastle nen an inkhelh hunah a dinhmun a chiang lo. 

Man City defender Nathan Ake hi tun kartawpa Tottenham nen an inkhelh hunah a la inlan dawn lo. Raheem Sterling pawh malpui hliam vangin Belgium nen a inlan lo a, Spurs nen pawh a dinhmun a chiang lo.