Liverpool legend Ray Clemence a thi

English goalkeeper ropui sawi apianga hming dai tawh lo tur, Liverpool vanglaia an goalkeeper ni bawk Ray Clemence chu kum 72 mi niin a thi a, a thih chhan hi kap bawr cancer a ni. 

Clemence-a chhungte chuan an pa ber boral thu hi mipui hriat turin an puangzar a, "A hmangaih em em a chhungte hual vel karah thlamuang takin a chawl ta a ni. Hun rei tak chhung a theihtawp chhuaha a beih hnuah a hahdam ta a, natna a tuar leh tawh lo ang," an ti a, hahdam takin an pa chu an thlah. 

England tana vawi 61 inlan thei goalkeeper hian Scunthorpe United-ah a career ṭanin June 1967 khan Liverpool coach ropui Bill Shankly chuan a lalut a, hetihlaia a man zat hi £18,000 (Nuai 17.74) a ni tawh. 

Liverpool tan league match 470 khelin league-ah vawi nga zet a champion pui a, European Cup (3), UEFA Cup (2), European Super Cup (1), League Cup (1), FA Cup (1) leh FA Charity Shield (5)-ah Reds tan nomawi a chawi bawk. 

Merseyside club hi kum 1981 khan a chhuahsan a, Tottenham Hotspur-a zawm. London Hmar veng club tan hian FA Cup, FA Charity Shield leh UEFA Cup nomawi vawi khat ṭheuh a chawi leh hman a ni. 

Clemence-a vanglai sawi nan Liverpool tana a vul lai hun sawi ni ṭhin mah se Spurs-ah pawh legend anga an pawm goalkeeper a ni a, November 2014 khan Tottenham Hotspur Hall of Fame-ah lakluh a ni hial. 

English goalkeeper ropui Peter Shilton chuan, " Ray Clemence-a awm ta lo tih thu min hrilh avang hian hrehawm ka ti takzet. Kan inel ṭhin a, mahse ka ṭhian ṭha tak a ni thung. Goalkeeper ṭha bik, fiamthu thiam tak a ni a, inkhelh chawlhsan hnu thlenga inkawm nasa kan nih avangin ka ngai dawn hle a ni," a ti. 

Liverpool legend, Sir Kenny Dalglish chuan, "Legend dik tak chu vawiinah hian kan chan a ni. Player khelhpui nuam tak a ni a, Anfield-a ka tlangnel theih nana min puihna zawng zawng zawng kha ka hre reng ang," tiin a ṭhianpa hi a thlah bawk. 

Inkhelh a chawlhsan hnua Spurs leh England national team coaching staff zinga tel tawh Clemence hi player langsar tam takin uina thu nen an thlah a, Liverpool legend Steven Gerrard, Jamie Carragher leh Ian Rush-te pawhin an club player ropui ṭhin hi an thlah a ni. 

Clemence-a nupui Veronica, a fapa, Spurs midfielder hlui leh Newcastle United assistant coach ni mek Stephen, a fanute pahnih Sarah leh Julie-te chuan, "Kan vaiin kan hmangaih em em em a, theihnghilh a ni ngai lo ang," an ti a, an pa hmangaiha thlawptute hnenah lawmthu an sawi bawk.