Spain nge Germany tling dawn?

UEFA Nations League finals-ah France leh Belgium an lut tawh a, zanin hian pakhat dang a hriat dawn. Zanin dar 1:15 hian Estadio de La Cartuja, Seville-ah Spain leh Germany an inkhel dawn a, hmun ruak pakhat an inchuh ang.

Group 4 inkhel dangah Switzerland leh Ukraine an inhmachhawn dawn. An intawn hmasak zawk ṭumin Ukraine 2-1 in an chak a, UEFA hnuai inelnaah head to head en a nih avangin Switzerland tan relegate pumpelh turin chak ngei a ṭul a ni.

Spain-in Switzerland lakah point khat chauh an hlawh chhuak thei a, pahnihna dinhmun an hauh lailawk phah. Hemi a nih avang hian khualmuala khel tur ni mah se Germany dinhmun a ṭha zawk a, Joachim Low hote tan finals lut turin draw a tawk.

Joachim Low chuan, "Spain kan tlawh hunah point khat hmuh tumin kan kal dawn lo. Chak tumin kan inpuahchah ang a, result ṭha neih ngei kan tum ang," tiin draw a tum loh thu a sawi thung.

La Roja boss Luis Enrique erawh a tum tur a chiang a, Low ang thoin chak a tum dawn. Barcelona manager hlui hi Spain-in result an neih ṭhat tawk loh avangin sawisel a hlawh. Enrique chuan, "Kan result-ah ka buai lo, ka thil hmuhah ka lungawi. Kawng dik kan zawh," tiin an khelh danah a lungawi thu a sawi thung.

Germany leh Spain hi Euro 2008 final-ah an inhmachhawn a, player an neih ṭhat bawk avangin ram inelna an thunun zui tiin a sawi theih. World Cup 2014 hnuah erawh ram pahnih hi a tlahniam ta deuh a, intuai thar an tum leh mek.

Switzerland nena an inhneh-tawk ṭumin Spain captain Sergio Ramos-a'n ṭum hnih penalty a hlah a, point thum hlohna chhanah mawhpuh theih mah se Real Madrid defender hi La Roja innghahna a la ni.

Ramos chuan, "Harsa takin point kan hlawh chhuak a, tunah chuan tha tharin Seville-ah chak ngei kan tum ang. Kan tihsual hi kan nihna lanna a ni lo a, kan thil tum kan tih hlawhtlin dan hi midangin min tehna zawk chu a ni," tiin thawhchhuah an tum tur thu a sawi.

Kum 34 mi Ramos hian penalty vawi hnih a hlah hma hian Spain leh Real Madrid tan a zawnin vawi 25 a khung a, ram tan vawi 177 khel tawhin record chelhtu Egypt player Ahmed Hassan (184) chu match sarih chauhin a phak tawh lo.

Germany tlarhma Serge Gnabry, Timo Werner leh Leroy Sane te hi hming langsar vek an ni a, match hnuhnung pahniha Ukraine leh Switzerland an hneh ṭumah Philipp Max a khel ṭha hle. Inhliam vangin Joshua Kimmich awm lo mah se Bayern Munich midfielder Leon Goretzka a rintlak a, Spain nen an inkhelh hunah Toni Kroos a chhawr theih a rinawm bawk.

Spain-in Switzerland an hmachhawn ṭumin Athletic Bilbao keeper Unai Simon-a'n bul a ṭan a, Luis Enrique-a'n keeper zawng zawng a rin thu sawi mah se Germany lakah chuan David de Gea a chhawr leh ngei a rinawm. Barcelona midfielder Sergio Busquets chu Switzerland lakah inhliam vangin lakchhuah a ni a, a dinhmun a chiang lo.

Busquets bakah hian rawlthar duhawm Ansu Fati a inhliam a, Enrique-a tan Man City winger  Ferran Torres, RB Leipzig midfielder Daniel Olmo leh Napoli midfielder Fabián Ruiz te chu an innghahna a ni dawn. Tun hma angin Spain hi player ṭha rual awm khawmna a ni ta lo. Germany nen an intawn hmasak ṭum  pawhin an vannei a, point khat an hlawh chhuak. Tun ṭumah erawh an muala inkhel tur a nih dawn avangin chak thei dinhmunah an ding.