Arsenal vawi 10 an chak zawn

Mesut Ozil-a'n khawvel midfielder hmuhnawm leh them thiam bik a nih zia a lantir zanah Arsenal chuan an mikhual Leicester City 3-1 in an hneh a, Unai Emery naute hian Premier League match sarih hnehna an chang zawn ta a; inelna hrang hranga an match hnuhnung 10-ah an chak fai vek.

Thawhṭanni zan Emirates Stadium-a inkhelah Gunners lamin goal khat phur hmasa mah se, midfielder Ozil-a goal hmangin an sut a; substitute Pierre-Emerick Aubameyang chuan goal hnuhnung pahnih a khung thung - point 21 hmuin league hmahruaitu Manchester City nen point hnih chauhin an inthlau.

Vanneihna hmasa
Unai Emery-a hnuaiah player nghet tia sawi theih an awm bik rih lo a, Fulham an sawp ṭuma inlan lo Ozil-a'n Arsenal tan captain armband hreng chungin inkhel bul a ṭan, defender Stephan Lichtsteiner chu Nacho Monreal aia dah a ni bawk.

Inkhel tir lamah Juventus player hlui Lichtsteiner-a'n Kelechi Iheanacho a veng hneh tawk lo, Foxes forward hian hnai tak aṭangin hun ṭha nei mah se goal pawnah a pet chhuak a, ṭha taka goal zawna a pet pawh keeper Bernd Leno-a'n a dan sak.

England international defen-der Harry Maguire-a'n kawh zeta a tauh chu goal ngei dawnin lang mah se, Germany keeper Leno bawkin a dan sak - hliam vanga chawl mek Petr Cech ai a awh zo hle. Gunners defender Rob Holding-a hand ball chu referee Chris Kavanagh-a'n a hmuh kan hlauh!

Arsenal defender Hector Bellerin-a'n Foxes defender Ben Chilwell-a cross dan a tumna lamah an mahni goal zawnah ball a per a, keeper Leno tan dan hman a ni tawh lo; hun chanve hma lam hmang ṭha zawk Leicester lamin hma an hruai.

Ozil leh Auba hun
Chawlhlawk hma chiahin Ozil-a'n ball tlan luh puiin a sira awm Bellerin tan pe pheiin, Spain international hian rang taka cross nghalin box laia awm Ozil hian laklawh nei miah loin goal kilah a pet lut.

Ram tana inkhelh a chawlh-san dan vanga sawisel hlawh Ozil-a'n midfield a thunun zui a, a ke aṭanga ball chhuak chu an goal hnihna luh theihna bul a ni; a siamsaktu chu Bellerin bawk niin hnai tak aṭanga a hmawr bawktu erawh bench aṭanga lut Aubameyang a ni thung.

Spanish manager Emery-a'n Arsene Wenger hunlai ang bawkin a naute chu leiah rang takin ball a in pek kual tir ṭhin, French manager hunlai aia a danglamna erawh goalkeeper aṭangin bul an ṭan ṭhin hi a ni.

An goal hnuhnung ber khung tur hian keeper Leno, Holding, Xhaka, Torreira, Ozil, Matteo Guendouzi, Bellerin leh Alexandre Lacazette ten ball an inpek kual hnuah Ozil-a'n Gabon international tan duhthusama ṭhain a pe - an mualah Arsenal an chak a, fans lawmna tizual turin inkhel hmuhnawm an lantir.

Second half
Arsenal-in Premier League-ah a zawnin match sarih hnehna an chang a, heng inkhel zawng zawngah hian half time laiin an inhnehtawk vek; Foxes nen an inhmachhawn hma hian an goal hnuhnung 19 zinga 14 chu second half-a an khung vek a ni.

Gunners manager Unai Emery chuan, "First half kan khar ṭha a, second half kha a ṭha zual a ni. Minute 90 chhunga kan hmasawnna kha hmuh hmaih theih a ni lo a, rilru put hmang a dik bakah kan theihna a sang telh telh bawk. Hnehna chan hi a hlu a, chak turin kan khel ṭha tawk bawk.

"Leicester City kan hneh hi a lawmawm, team ṭha Liverpool, Manchester City leh Chelsea te nen inhlat lo takin kan awm theih phah a ni. Tunah hian season tawp khar dan tur sawi hun a la ni lo a, match lehpeka Crystal Palace nen kan inkhelh tur leh Europa League kan ngai pawimawh hmasa ang," tiin a sawi.

An chak loh danah Leicester boss Claude Puel a lungawi lo a, penalty an hlawh loh chungchang sawiin Puel chuan, "Ka nauten an khel ṭhain an thawkrim a, kan phu ang tawk thutlukna an hmu lo kha a pawi. Ka hmuh dan chuan penalty a ni, stadium chhunga awm kha chuan penalty a nih zia kan hmu a ni.

"Holding khan yellow card vawi hnihna hmu thei a ni a, penalty min pe bawk ni se la chuan inkhel result a danglam ang. Inkhelh ban khan referee ka be hran lo, inkhel entu khan a nihna tak an hmu," tiin a sawi.

Ngaihnawm
* Arsenal hian 2007 October hnua a vawi khat nan inelna hrang hrangah a zawnin match 10 hnehna an chang leh ta, an record neih lai hi match 12 a ni.
*Inelna hrang hrangah Leicester City hian Arsenal an tlawh hnuhnung vawi 26-ah chak ni hmel an hmu lo, an hneh hnuhnung ber chu 1973 September thla daih tawh kha a ni.
* Aubameyang-a'n Arsenal tan Premier League match 22 a khel tawh a, goal 21 zetah a inrawlh. Goal 16 a khung bakah assist ngawi nga a nei.
* German player zingah Ozil chu Premier League goal khung hnem ber (30 goals) a ni ta a, goal 29 khung thei Jurgen Klinsmann leh Uwe Rosler te a khum.
* Ozil-a'n league match a khelh hnuhnung paliah goal thum a khung. Bellerin hian a vawi khat nan EPL-ah an mahni lamah a khung
ve thung.