Conor McGregor a ṭawng chhuak ; Khabib a ngam lo tih a pawm!

UFC fighter zinga boruak nei lian bera chhal ngam Conor McGregor chu UFC 229-a Kha­bib Nurmagomedov nena an intawn chungchangah a ṭawng chhuak ve leh ta a, "Ka tlawm danah sawisel tur a awm lo," a ti.

Kum 30 mi fighter chuan Khabib hmachhawn turin a inbuatsaih ṭha tawk lo tih a pawm a, "Dik tak leh sawisel tur awm loin ka tlawm a ni. Hun pawimawh takah tihsual ka nei a, ka inbuatsaih ṭha tawk lo a ni," tiin a tlawmna a pawm.

McGregor hi Khabib nena inhmachhawn nawn tura sawi a ni - mahse Irish fighter hi kawng tinrengah a tlawm zawka a ṭan avangin mi tam takin 'rematch' neihna tlakah an ngai lo.

Nurmagomedov manager Ali Abdelaziz chuan hmalam an pan thu leh, rematch an ngaihtuah loh thu a sawi tawh a, McGregor pawhin amah hmachhawn nawn duh lotu hmachhawn luih a tum lo.

UFC fighter zinga sum lalut hnem bera chhal ngam chuan, "Inrintawkna nasa tak nen, inpeih tak chungin ka lo kir leh ang. Tunah rematch neih an duh lo a nih chuan ka pawm a, ka hmaa ding tur apiang ka hmachhawn mai ang," a ti.

McGregor-a'n Khabib a hmachhawn khan round linaah Russian fighter hian a man fuh avangin a tal chhuak thei tawh lo a, a 'tap out' - Irish fighter hian round lina thlenga an inhmachhawnna a hmuhdan a sawi chhuak.

Round khatna

"Infiamna huang aṭanga thlir chuan round khatna kha chu Khabib-a chanpual a ni. Bang hungna chhawr ṭangkaiin min bawhbeh a tum reng a, mahse attacking game erawh a khel lo.

"Fight thlirna aṭang hrim hrim chuan round khatna kha ka chanpual a ni. Kei chuan inhnaih chilh duhin amah kha ka pan reng a, ka theihna zawng zawngin ka bei a ni.

"Ani erawh chuan a kein bang a intlawh chhan reng ringawt a, round khatnaah kha chuan tih ve a nei meuh lo."

Round hnihna

"Cage chhungah a tlan kual a, a hnuah a kut dinglam hmangin min hnek fuh a, kha khan kha round leh kan fight kha tam takin a thlak danglam a ni. A kut kha a rawn hnek chhuak ṭha hle.

"Min hnek fuh hnuah khan awlsam takin ka insiamṭha lehnghal a, mahse in hnaih chilh lutuk duh loin a tlanchhe leh ṭhin. Mahse, kha kha infiamna chu a ni a, sawisel theih a ni lo.

"Ka rilru pe deuhin kha ai khan fimkhur deuh ila, ka khingpui kha tlem talin lo dah sang ve deuh hlek ni ila chuan tuna ka thawnthu hi chu a danglam daih ang.

"Khabib chu wrestling lama thiamna nei bik a ni a, kha a thiamna kha zah tawk loin ka inbuatsaih ṭha tawk lo a ni. Khatiang chu a thleng leh tawh lo ang. Mahse, khata ṭang khan zir chhuah ropui tak ka nei. 'I theihna chu nangman i hrechiang ber a, nang hi i theihnaah chuan 'master' i ni tih hi a ni."

Round thumna

Ka career-a round duhawm lo leh harsa ber ka hmachhawn hnuah ka insiamṭha a, he round-ah hi chuan ka tho leh chiang a ni. Hma lam ka pan a, ka ti tlu a, hnathawh reng mai kha ka duh a ni."

Round lina

"Insiamṭhat ka tumna lamah ka tifuh tawk lo. A tir lamah che fuh zawk mah ila a thiamna hmang bawkin min bei let a, ani chuan min buan thluk kha a duh ber a ni.

"Theihtawp chhuahin ka dinhmun sawhrem turin ka ṭang a, mahse ka chesual a, ka tho thei tawh lo a ni. Ka tihsual liau liau a ni a, sawisel tur awm miah loin ka tlawm a ni."