Champions League group ngaihnawm Red Star vs Liverpool; PSG vs Napoli

Zaninah Champions League group stage-a group ngaihnawm ber pawl Group H inlan hun a thleng a, he group inkhel tur hian ngaihven a hlawh hle.

Liverpool chuan zanin dar 11:25 hian Red Star Belgrade an lenchilh dawn a, Paris Saint-Germain chuan zanin dar 12:30-ah Napoli an mikhual bawk ang.

Group C-ah team an intluk tlang hle - hnehna an chan chuan hmahruaitu ni thei vek an ni a, PSG, Red Star leh Liverpool te hi group mawngphaha awm thei vek an ni bawk!

Zinkawng harsa

Liverpool-in duhawm taka season bul an ṭan hnuah September-in fixture harsa a herchhuahpui a, a tir lamah Tottenham Hotspur, PSG leh Southampton hneh nghal mah se an ṭang rei thei bik lo.

League Cup-ah Chelsea chu 1-2 in an ngam lo phawt a, Premier League-ah 1-1 in an inhnehtawkpui zui. Reds mangchhia a kiang mai lo. Champions League-ah Napoli chu 0-1 in an ngam lo zui a, goal khat chiah an chhuah avangin an vannei.

Liverpool-in Manchester City an tawng leh zui a, goal khung loin an inhnehtawk. Reds fixture hautak a liam a, Huddersfield chu khualmualah 1-0 in an hneh zui. Red Star hmachhawn hmaa hnehna an chang thei hi an lawm khawp ang.

Mangṭha September!

Liverpool-in fixture hautak mangṭha nan Huddersfield hneh mah se an khelh danah erawh lawmna tur a tlem a, season ṭantira Liverpool team hmuhnawm tak kha hmuh tur a awm lo.

Tun hnaia Liverpool buaina chu season hmasaa an chhuanvawr Mohamed Salah, Sadio Mane leh Roberto Firmino ten season hmasa an phak lo hi a ni a, goal an khung hleithei lo. Liverpool-in tun season-ah vawi riat hnehna an chang tawh a, match hnihah chiah goal khat aia tam an khung.

Reds-in Red Star lakah insiam

ṭhat an tum ang a, Napoli leh PSG an la awm miau vawk avangin Serbian club laka tlawm hi Champions League mangṭhana ang hiala chhiar theih a ni ang.

Mane tel lohna?

Liverpool tlarhma-in season hmasa phak lo mah se tun season-a fak an hlawhna erawh tlarhnung a ni a, Virgil van Dijk leh Alisson hoin an nghing meuh lo. Premier League match kua an khelh tawhah goal riat chiah an la chhuah a, Red Star tlarhma tan sut hawn a huphurhawm ang.

Merseyside club tan Sadio Mane chu Senegal tana a inhliamna avangin a inlan theih a beiseiawm loh a, Huddersfield laka lakchhuah captain Jordan Henderson hmunruaka bul ṭan turin Fabinho leh Georginio Wijnaldum te an awm bawk.

Match hnih ngawt bench-a dah a nih hnuah Trent Alexander-Arnold chuan inkhel bul a ṭan beisei a ni a, English defender hmun kiam turin Joe Gomez emaw Dejan Lovren an chhuah a ngai ang.

Red Star maw?

Serbian champion hi Mizo zingah chuan hria kan la tam kher lo ang. Liverpool nen tun hmain vawi hnih an lo intawng tawh a, rin loh taka result nei ṭha zawk chu Red Star an ni - an chak ve ve!

Bill Shankly enkawlna hnuaia team hmingthang tak kha European Cup last 16-a match hnih an khelhah an hneh ve ve. Team pahnih intawn hi 1973/74 season kha a ni a, kum tam liam hnuah an intawng leh dawn ta.

Red Star hian an match hmasa berah goal khung loin Napoli an inhnehtawkpui a, mahse an match hnihnaah PSG chu 6-1 ngawtin an ngam lo zui - attacking football khel ṭhin Liverpool tan goal khung theihna tur an ni.

Hei le PSG

PSG neitupa Nasser Al-Khelaifi-a'n French club a neih tirha a tum hmasak ber chu Europe-a rorel a ni a, a mang ram ti hlawhtling turin sum pawh a seng hnem - a beisei ang erawh a la hmu lo.

He team hian France-ah chuan season dang ang thoin ro an rel a, zanina an tawn tur erawh an ngam loh Liverpool ngamtu Napoli an ni a, Italian club hian PSG boss hlui Carlo Ancelotti an la kawl zui!

Champions League-a tawnhriat ngah ber pawl manager hian PSG a hlauin a rinawm lo a, coach aṭanga khaikhin tur a nih phei chuan Thomas Tuchel tan chuan Italian manager hi cho rual a ni lo. Mahse, Napoli striker hlui Edinson Cavani Neymar leh Kylian Mbappe neitu an nih avangin PSG an zam lo ang.