Messi tel lohna Barcelona

Zanin dar 12:30 hian Barcelona-in Nou Camp-ah Inter Milan an mikhual dawn a, Catalan club tan Lionel Messi chu a inlan thei dawn lo. UEFA Champions League group B-ah Barcelona leh Inter Milan ten point ruk ve ve an hlawh chhuak a, a chak zawk tan knockout stage a hnai ang. English club Tottenham Hotspur erawhin point an la hmu lo a, zanin dar 10:25 hian PSV Eindhoven an hmachhawn dawn.

Messi a inhliam

Kar tawp khan Barcelona-in an mualah Sevilla chu 4-2 in an hneh a, darkar chanve pawh tling loah Lionel Messi chu hliam vangin lakchhuah a ni. Argentine forward hian assist leh goal khat a nei hman tho a, zaninah erawh hliam vangin Inter Milan a hmachhawn ve thei dawn lo.

Kum 31 mi Messi hi tun ṭum hi vawi 21 a inhliamna a ni a, Barcelona hian hliam vanga Messi an chhawr theih loh ṭumin match 80 an khel tawh a, vawi 48 chak leh draw vawi 17 niin vawi 15 an chak lo.

Barcelona hian an jersey no. 10 tel lo hian 60% an chak a, nghawng a awm tih a lang. Messi hian tun season Champions League match hniha goal nga a khung avangin a awm lo tur hi a uiawm lehzual dawn. Manager Ernesto Valverde-a'n thutlukna a siam a ṭul dawn a, Luis Suarez thlawp turin Ousmane Dembele leh Philippe Coutinho te an awm a rinawm.

Tlarhnungah pawh Thomas Vermaelen leh Samuel Umtiti te an la inhliam avangin Gerard Pique kawppui turin French defender kum 23 mi Clement Lenglet chungah rinna an nghah ngam a ṭul ang. Catalan club hi La Liga-ah hmahruaitu ni mah se an result a ṭha tawk lo - kartawpah chak mah se match kua an khelh aṭangin point 18 chauh an hmu.

Messi tel loa an khel tur hi Barcelona tan a harsa dawn a, Pathianni zana Real Madrid nen El Clasico an khelh lehnghal dawn avangin Inter Milan nena an inkhel tur hi a harsat belh sawt ang.

Icardi a dam

Inter Milan erawh Milan Derby-a chak zo hlim an ni a, hun tawp dawna chakna goal khungtu Mauro Icardi a dam. Argentine forward Icardi hian Messi ang thoin Spurs leh PSV lamah a khung ve ve a, league match sarihah pawh goal li khungin assists vawi hnih a nei tawh bawk.

Icardi ven fimkhur a ṭulna tak erawh Spurs nena an inkhel ṭumin goal a khung hmain dah ṭhat a ni a, amaherawhchu a hun ṭha neih chhun a hlah lo. Chuvangin minute 90 chhung tawp Catalan club pawhin an ven a ngai dawn. Icardi bakah hian Sassuolo aṭanga loan-a an hawh Matteo Politano leh FIFA World Cup hnuhnung ber hmang ṭha Ivan Perisic te chu ven ngai an ni a, mahse zanin hian hliam vangin Radja Nainggolan an chhawr thei dawn lo.

Tottenham beiseina

Tottenham Hotspurs-in match hmasa pahnih aṭanga point an hmuh loh avangin group stage thleng lo thei dinhmunah an ding a, PSV an hmachhawn hmaa West Ham khelmuala hnehna an chan avangin inrintawkna erawh an neih belh thung ang.

Spurs midfielder Christian Eriksen chu hun rei tak a inhliam hnuah Hammers nen second half-ah a rawn lut a, Mousa Dembele nen PSV an hmachhawn hunah bul an ṭan theih a rinawm. Danish playmaker Eriksen hi Mauricio Pochettino game plan tih hlawhtlin nan a ṭangkai ṭhin a, a dam ṭhat takah chuan Harry Kane leh Spurs tlarhma an hlauhawm sawt ang.