Paris lamah Sindhu
Tun kar chhungin Badminton inelna ngaihhlut te zinga pakhat French Open khelh a ni leh dawn a, Indian shuttler PV Sindhu tan tun hnaia a result ṭha lo tak insiamrem theihna hun a ni ang.
Seeded pathumna Sindhu hian Denmark Open ang bawkin a match hmasa berah Deiwen Zhang a hmachhawn dawn a, United States nula hi a hneh loh hlim a nih avangin Rio Olympic silver medalist tan fimkhur a ngai dawn. Zhang hi a hneh a nih chuan Chinese shuttler ṭha He Bingjiao nen an inkhel leh thei dawn bawk.
Denmark Open-a pahnihna Saina Nehwal chuan a khelh ṭhat chhawm nun a tum thung dawn. Saina hian a match hmasa berah hna hautak a pumpelh tura ngaih a ni, Japanese shuttler Saena Kawakami hi a paltlang a nih chuan a hna a hautak thung ang; world number 1 hlui Nozomi Okuhara nen an kawng a inang.
Mipa singles lamah Kidambi Srikanth chuan Hong Kong tlangval Wong Wing Ki Vincent a hmachhawn dawn a, tun hma lama an intawn tawhnaah Srikanth hian 6-3 a hma a hruai avangin chak tura rinkai a ni.