LeBron awmna Lakers an chak thei lo

LeBron James chuan Los Angeles Lakers a pan hnua NBA regular season a hman laiah chak ni hmel a la hmu lo. Nimin zing khan inkhel inhnehtawk takah San Antonio Spurs chu 143-142 in an ngam lo.

Staples Center-a inkhel team pahnih an inbei tawk hle a, quarter pali an khelh zawh hnuah an point a inzat avangin over time khelh a ni. Hun tawp dawnah James-a'n free throw vawi hnih a lut lo. Spurs lam tan Patty Mills chuan second 6.8 chauh a awm tawh tihah basket pawimawh tak a lut thung.

Kum 33 mi James hian a khel chhe lo, point 32 score in assist vawi 14 a neih bakah rebounds vawi riat a la bawk. Amaherawhchu, American star hian tun hma lama a team a chakpui ṭhin ang kha a la thlen tir thei rih lo; match thum an tlawm zawn tawh, Zirtawpni zing dar 8:00-ah Nuggets nen an inkhel leh ang.

Match hmasa bera an chak loh hnu khan James hian hun an mamawh thu a sawi a, tun thleng chuan an beisei angin an la khel chhuak lo. James chuan, "Result ṭha kan neih theih nan kan thawkrim chhunzawm ang, eng nge ka tih tur ka hrechiang a, midang pawhin an hna ṭheuh an tlin hle chuan ka hria.

"Team indin thar leh mek kan ni a, team ṭha sa te khelh anga khel chuak tur chuan insiamremna hun kan la nei tam tawk lo a ni," a ti. Lakers coach Luke Walton pawhin hnehna chang lo mah se nitin hmasawnna hmuh tur a awm avangin a lawm thu a sawi ve bawk.