Indian Arrows tana khel tur Biakhlua

All India Football Federation-in Indian rawlthar rual ten club football match an khelh tama, hma an sawn zel theih nana an din Indian Arrows-ah Mizo pakhat a awm belh dawn.

Lunglei goalkeeper Lalbiakhlua Jongte chu India Under 16 aṭanga Indian Arrows squad-a hlankai zingah a tel a, October 26 aṭanga khelh ṭan tur I League-ah a inlan ve tawh dawn tihna a ni.

Biakhlua bakah hian left full­back Gurkirat Singh, forward Rohit Danu leh India U16 captain Vikram Pratap Singh te pawh an tel a ni.

India Under 16 hi AFC Under 16 Championship-ah quarterfinal inpetkai te kha an ni a, squad-a player tam zawk chu Ozone FC, Bengaluru FC leh Minerva Punjab-ah te kir tir niin a bak zawng hi India U16-ah hian awm zuiin Under 18 Youth League an khel ang.

Malaysia-a AFC U16 Cham­pionship-ah khan Biakhlua bakah Serchhip midfielder Eric Remruatpuia Chhangte, Lengpui midfielder Lalrokima leh Armed Veng rawlthar Lalchhanhima Sailo te pawh an tel a ni.

Indian Arrows-ah hian Mizo pakhat a awm sa, India Under 17 tana World Cup-a lo inlan tawh Vaivakawn rawlthar Lalengmawia a awm mek a ni.