December-ah Fury a inlan leh dawn lo

British boxer rothap Tyson Fury chu December-ah ring chhung rapa lo kir leh tura beisei ni mah se a inhnek thei dawn lo a, "Gypsy King (a hming lem) chu kum 2021-ah a lo kir dawn e," tiin twitter lamah a ziak. 

Fury hian February khan American boxer chanchin ngah ve tak Deontay Wilder chu a hneh a, hemi hnu hian inhnek a hmachhawn leh tawh lo. Kum 32 mi boxer hi German boxer ṭha Agit Kabayel nen December 5-ah London-a inhnek tura ngaih a ni. 

Mahse, British boxer hian nakkumah bak a inhnek tawh lo tur thu a puang chiang a, "Ka lo kir leh hnua 100% a min thlawptute chauh chu ka ropuina min lawmpui turin an tel ve ang," a ti a, a inhnek leh hun tur chu kum 2021 a nih thu a sawi tel.

Fury hi a nihna takah chuan Wilder nen a vawi thum nana inhnek tura beisei an ni a, mahse nipui laia an inhnek tur hi a hlawhtlin tak lohah chuan Fury hian an contract-a an ziah chu a 'thi' hman tawh niin a sawi. 

Kar hmasa khan Wilder chuan Fury hi inremna an lo neih tawh chu zah turin a ti a, British boxer hian Wilder-a'n a puhna duhawm lo tak avangin American boxer chu a hnek ngai tawh loh tur thu a sawi thung. 

Wilder hian February thla a Fury a hneh loh khan British boxer hian a glove-ah hnek natna a phum ru niin a sawi. Las Vegas-a Wilder a tlawm hma khan boxer pahnih hi sawisel hlawh takin inhnehtawkah puan an lo ni tawh a, a vawi hnihnaah erawh Fury chungnung zawkin WBC world heavyweight title a hlawh chhuak 

a ni.