Rangers leh Barca ten Dortmund leh Napoli an pet chhuak
Europa League Knockout Playoff khelh zawh a ni a, Rangers-in German club ṭha Barcelona chu khualmuala 4-2 a an hneh hnuah Ningani zan khan Ibrox Stadium-ah 2-2 in an chelh a, aggregate-ah 6-4 in hnehna an chang. Barcelona-in an la chawi ngai loh Europa League nomawi chawi turin beiseina a la chhi nung zel a, last 16 lut turin Stadio San Paolo-ah mualneitu Napoli 4-2 in an hneh a, aggregate-ah 5-3 in an chak.
Inkhel dangah Sevilla-in Dinamo Zagreb 1-0 in hneh lo mah se an muala 2-0 a an chak tawh avangin Spanish club hi an tlang tho. RB Leipzig, Atalanta, Porto, Real Betis leh Sporting Braga ten last 16 an lut bawk. Nimin tlai khan fixture pawh nghal a ni a, Premier League club West Ham leh Sevilla te an inhmachhawn dawn a, last 16 inkhel tur zingah en châkawm ber a ni thei hial ang.
Barca an mawi
Napoli-in Nou Camp-ah Barcelona an chelh a, Italian club-in last 16 luh beiseina an nei sang. Amaherawhchu Xavi hoten tum dang an nei a, khualmualah game mawi pholangin Jordi Alba, Frenkie de Jong, Gerard Pique leh Pierre-Emerick Aubameyang te goal hmangin hnehna an chang.
Napoli hian goal hnih khung ve bawk mah se Italian club goal khung hi Barca tihsual ve veah a ngaih theih. German keeper Andre Ter Stegen fimkhur tawk loh vangin penalty a chawi a, Lorenzo Insigne-a'n goal-ah a chantir. Barca-in tlarhnung aṭanga in pass chhuah an tum a, an chetsual vangin Lazio tan Matteo Politano khung mah se Catalan club-in goal li an khung tawh. Xavi nauten passing game an khelh ngam avangin Barca ṭantute an lawm ang.
Barca manager Xavi Hernandez chuan, "Tun season-a kan khelh ṭhat ber a ni hial ang. Inkhel thunun kan duh ang chiahin kan thunun a, kawng dik kan zawh mek a ni," tiin team thar an din ṭan thu a sawi. Catalan club hian Pathianni zan dar 1:30 hian Nou Camp-ah Athletic Bilbao an mikhual ang.
Rangers an ṭang tlang
Borussia Dortmund-in second leg-ah an striker chhuanvawr Erling Haaland an la chhawr thei lo a, Rangers lakah an tho chhuak lo. Scottish club-in James Tavernier penalty hmangin hma hruai mah se Dortmund-in Jude Bellingham leh Donyell Malen te hmangin first half-ah an lehthal.
Away goal rule a awm loh avangin Dortmund tan extra time thleng turin goal khat dang an mamawh, chak turin goal hnih an mamawh a, minute 45 hun an nei. Amaherawhchu Dortmund ni loin Rangers zawkin goal an khung a, Tavernier-a'n minute 57-naah siphurh sutna goal a khung. Ibrox Stadium-ah 2-2 in an inhnehtawk a, aggregate-ah Rangers 6-4 in an chak.
Rangers boss Giovanni Van Bronckhorst chuan, "Dortmund anga team ṭha kan hmachhawn chungin khualmualah kan chak a, kan mualah kan inhnehtawk a, kan khel ṭha hle a ni. Last 16 a nih tawh avangin team ṭha chauh an dam tawh tihna a ni a, chutiang zinga kan tel ve chu a lawmawm hle a ni," tiin a sawi.
Europa League
Knockout Playoff
2nd leg : February 24, Ningani
Dinamo Zagreb 1 - 0 Sevilla
DIN : Mislav Orsic 65' (P)
Agg-ah Sevilla 3-2 in an chak
Real Sociedad 1 - 3 RB Leipzig
RSO : Martin Zubimendi 65'
RBL : Will Orban 39'; Andre Silva 59';
Emil Forsberg 89' (P)
Agg-ah Leipzig 5-3 in an chak
Olympiakos 0 - 3 Atalanta
ATA : Joakim Maehle 40'; Ruslan Malinovskyi 66', 69'
Agg-ah Atalanta 5-1 in an chak
Lazio 2 - 2 Porto
LAZ : Ciro Immobile 19'; Danilo Cataldi 90+4'
POR : Mehdi Taremi 31' (P); Mateus Uribe 68'
Agg-ah Porto 4-3 in an chak
Napoli 2 - 4 Barcelona
NAP : Lorenzo Insigne 23' (P); Matteo Politano 87'
FCB : Jordi Alba 8'; Frenkie de Jong 13'; Gerard Pique 45'; Pierre-Emerick Aubameyang 59'
Agg-ah Barcelona 5-3 in an chak
Real Betis 0 - 0 Zenit
Agg-ah Real Betis 3-2 in an chak
Rangers 2 - 2 Borussia Dortmund
RAN : James Tavernier 22' (P), 57'
BOR : Jude Bellingham 31'; Donyell Malen 42'
Agg-ah Rangers 6-4 in a chak
Sporting Braga 2 - 0 Sheriff
BRA : Iuri Medeiros 17'; Ricardo Horta 43'
Agg-ah 2-2 in an inhnehtawk a, penalty shootout-ah Braga 3-2 in an chak.
• Champions League ang thoin Europa League knockout chinah away goal rule a awm lo.
• Tun season-ah Europa League khelh dan phung thlak hret a ni a, second round khelh dan an thlak.
• Europa League group stage-a pakhatnain last 16 an lut nghal.
• Last 16 lut tawh team-te chu Lyon, Monaco, Spartak Moscow, Eintracht Frankfurt, Galatasaray, Red Star Belgrade, Bayer Leverkusen leh West Ham United te an ni.
• Champions League group stage aṭanga tla thla (pathumna) leh Europa League group stage-a pahnihna ten knockout playoff an khel.
• Europa League knockout playoff first leg khelh zawh a ni a, second leg hi February 24, Ningani zanah khelh a ni ang.
• Nimin tlai khan Last 16 fixtures pawh a ni. Last 16 first leg leh second leg hi March 10 leh March 17, 2022-ah khelh leh tur a ni ang.
Last 16 Fixtures
Rangers vs Crvena Zvezda
SC Braga vs AS Monaco
FC Porto vs Lyon
Atalanta vs Bayer Leverkusen
Sevilla vs West Ham
Barcelona vs Galatasaray
RB Leipzig vs Spartak Moscow
Real Betis vs Eintracht Frankfurt