Italy leh Netherlands an chak
UEFA Nations League finals lut turin Italy dinmun a ṭha. Roberto Mancini hoten Pathianni zan khan Poland 2-0 in an hneh a, group match hnuhnung bera Bosnia-Herzegovina an hneh chuan an group-ah pakhatna an ni ang. Group 1 inkhel dangah Netherlands-in Bosnia-Herzegovina 3-1 in an hneh ve bawk.
Mapei Stadium, Reggio Emilia-ah Italy tan Jorginho-a'n minute 27-naah penalty aṭangin goal hmahruai khung a, minute 83-naah Domenico Berardi-a'n a khung belh leh bawk. Poland player Jacek Goralski chu minute 77-naah hnawhchhuah a ni a, Robert Lewandowski-a telna team-in goal an khung lo.
Italy an ṭha Ram inelnaah Italy an tlahniam rei a, tunah erawh khelmuala an result thlirin team ṭha zingah an chhiar leh thei tawh. Azzuri hian Euro 2020 khel turin hneh loh an nei lo a, Nations League-ah pawh hian chak loh an la nei lo.
Italy assistant coach Alberico Evani chuan, "Kawng engkimah Poland lakah inkhel kan thunun a, player ṭhahnem tak inhliam chungin kan khel ṭha hle. Italian te hi chu hun harsaah kan thawhhona a ṭha lehzual a, inkhelh hmain ka naute theihtawp chhuah turin ka ngenna a, khelmualah a chhanna hmuhtir," tiin a player-te a fak.
Azzuri coach Roberto Mancini chuan Covid-19 positive vangin a naute a ho thei lo a, player khel thei lo zingah season liam taa Serie A top scorer Ciro Immobile pawh a tel.
De Boer-a hote an chak
Netherlands-in Frank de Boer-a kaihhruaina hnuaiah hnehna an chang ve ta a, Georginio Wijnaldum goal hnih leh Memphis Depay-a goal khung hmangin Bosnia and Herzegovina 3-1 in an hneh.
De Boer chuan, "Kan ranna leh thahrui hmangin kan nawr a, kan khingpuiten dan harsa an ti hle. Inkhelh ṭantirh minute 25 chhung kha chu kan khel ṭha takzet a ni," tiin a sawi. Oranje hian minute 13 chhungin Liverpool midfielder Wijnaldum hmangin goal hnih an khung nghal.
Media lamin match hmasa palia a chet ṭhat loh chhan an zawt a, De Boer chuan, "Hria ni ila, khawvela coach ṭha ber ka ni ang," tiin a sawi. Netherlands hian match hnuhnung berah Poland an hmachhawn dawn a, finals lut turin point thum hmuh a ngaih bakah Italy-in Bosnia-Herzegovina an hneh loh a ngai bawk.