A tawpah Arsenal an chak hram
Premier League inkhel hmuhnawmah Arsenal chuan Wolverhampton Wanderers 2-1 in an hneh a, point thum hlu tak hlawh chhuakin season thara Champions League khelh an tumna an chhawm nung zel.
Mikel Arteta naute hian league match 24 an khelh aṭangin point 45 an hmu a, pangana dinhmun an luah. Palina Manchester United aiin match hnihin an khel tlem zawk, an inthlauhna chu point khat chauh a ni.
Super Sub
Ningani zan Emirates Stadium-a inkhelah mikhual Wolves lamin goal an nei hmasa. Minute 10-na lekah defender Gabriel-a back pass sual chu Hwang Hee-chan-a'n a chang fuh a, keeper Aaron Ramsdale lak khalh hmain goal hmahruai a khung.
Ball chang tam Arsenal lamin an sut mai thei lo, an mualah tlawm thei dinhmunah an ding. Mahse, manager Arteta-a'n vanneihna a zawng, defender Cedric Soares la chhuakin Eddie Nketiah a dah lut, Gabriel Martinelli chu Nicolas Pepe-a'n a rawn thlak bawk.
Nketiah hian Pepe tan a siamsak. Ivory Coast inter-national hi box chhunga a ball hmuh chu a vir pui hnuah mawi zetin a khung a, hun tawp hma chiahin Nketiah ball pek bawk Alexandre Lacazette-a shot chu keeper Jose Sa-a'n anmahni lamah a ti lut.
Beiseina nung
Tun hnai kum nga chhung chu Arsenal hian Champions League an khel pha lo. European football inelna sang ber khelh leh phak chu an thil tum lian a ni a, tuna a lan dan chuan an hma hun chu an kuta awm a ni.
Gunners manager Arteta chuan, "Season tir match hmasa pathumah kan tlawm a, inelna hniam lama tlai mai tur anga sawi kan ni hman. Mahse, zawimuangin hma kan sawn, thil tum mumal tak kan neih chu kan pan mek zel.
"Tun ṭuma hnehna kan chan hi a hlutna kan hrethiam phak lo hial mai thei, kan tan chuan point thum hlu bik a ni," tiin a sawi a, hun tawp dawn thlenga beidawng lo a naute khelh dan a fak bawk.
Palina boruak
Arsenal hian an khelh hmabak pahnihah hnehna an chan chuan palina an ni dawn. Chutih rualin chak reng erawh a awlsam bik lo, tun kar tawpah an awl dawn - an elpui Manchetser United chuan zanin dar 8:30 hian Watford an mikhual thung ang.
Cristiano Ronaldo awmna Man United tan UCL khel phak tur chuan chetsual a thiang tawh dawn lo. Ralf Rangnick-a'n tlarhnung a rem phui a ngai dawn, an match hnuhnung pahniha an goal chhuah danah hmasawn an mamawh.
Palina nih tum ngam zinga mi Wolves an inlan leh nghal dawn. Pathianni zan dar 7:30-ah an elpui West Ham an lenchilh dawn, a chak lo zawk tan season thara Champions League beiseina a zuih chho tawh viau ang.