Number 1 aṭanga tla tur Djokovic

Mipa tennis world number 1 ni lai Novak Djokovic chu a dinhmun aṭanga hnuh hniam a ni dawn. ATP ranking chhuak tharah chuan Djokovic hi pahnihna a ni dawn, a chung berah Daniil Medvedev a awm ang.

Season kal laia a vawi khat nan Djokovic hian tournament a khel ve chauh. Dubai Tennis Championship-ah inlanin quarterfinal a paltlang zo lo. Ningani zan khan a khingpui Jiri Vesely lakah 6-4, 7-6 (7-4) in a chak lo a ni.

Kum 34 mi Djokovic-a'n number 1 dinhmun hi chawlhkar 361 chhung a lo luah tawh, ani aia number 1 ni rei thei an awm lo. Tournament a khelh tlem bakah, tun hnaia a chet ṭhat tawk loh avangin a ranking a hniam dawn a, a sang bera lawm leh tur erawhin kawng a inhawng reng.

Serbian star Djokovic hian Covid-19 vaccine a la duh lo a, invenna a lak duh loh avang hian Australian Open pawh a khel thei lo. Melbourne khawpui aṭanga thawn haw a nih avang hian a ranking point neih sa pawh a hum thei lo a ni.

Tournament a khelh tam loh miau avangin Djokovic-a'n tun hma a phak lo, tun ṭuma a hneh loh pawh hi world number 123 daih a ni. Vesely chuan, "A nihna takah chuan Novak hneh turin ka tan kawng a inhawn ka ring phak lo.

"Khawvela tennis player ropui berte zinga mi ka hneh ka ni a, hun hlimawm leh danglam bik chu a ni ngei mai," tiin a sawi. Vesely hian 2016 Monte Carlo-ah khan Grand Slam vawi 20 champion tawh hi a lo hneh tawh bawk.

Number 1 thar tur Medvedev hi tun hnai kum hnih leh a chanve chhung chu a khel ṭha hle. A vawi khat nan US Open nomawi a chawi a, inelna lian dang - Australian Open, French Open leh Wimbledon final a lut vek bawk a ni.

Player ropui Roger Federer, Rafael Nadal, Djokovic leh Andy Murray te tih lohah chuan, tun hnai kum chhunga number 1 ni thei leh hmasa ber tur chu Medvedev a ni a, kum 26 mi a nih avangin hmabak pawh a la nei êng hle.